Сонин юм шүү, амьдран суугаа дэлхийгээ мөнхөд оршино гэж бодож явснаас “нүд аних” аюулд нэрвэгдсэнийг нь сонсоно гэж үнэндээ зүүдэлж ч байсангүй. Харамсалтай нь, энэ гашуун үнэнтэй бид нүүр тулахаас өөр аргагүй болжээ. Хүн төрөлхтөн хөгжлийнхөө олон мянган жилийн түүхэнд алдаа оноотой олон өдрийг үдсэн билээ. Тэр алдаа нь зөвхөн хүний нийгмийн хүрээнд л тусдаг байсан бол одоо энэ нь савнаасаа аль хэдийнэ хальж байгаль,бүр тодруулбал эх дэлхий рүү чиглэчихэж. Өөрөөр хэлбэл, бид амьдран суугаа дэлхийгээ өөрсдийн гараар сүйтгэж байна. Хэн ч орон гэрээ түйвээхийг боддоггүй. Гэтэл дэлхий бол бидний хоёр дахь орон гэр гэдгийг олон хүн мартчихаж. 

      Хамгийн аймшигтай нь, биднийг буруугаа бие бие рүүгээ чихэж байх хойгуур дэлхийн “нүд аних” болзошгүй хугацаа ч тодорхой болчихож. Эрдэмтдийн хийсэн судалгаагаар 1961-2020 онд гэхэд л дэлхийдээ үзүүлж буй бидний зүй бус дарамт дөрөв дахин нэмэгдсэн байна. Хэрвээ бид дэлхийн дулаарал, байгаль орчны бохирдол зэрэг өөрсдөө буруутай үйл ажиллагаандаа томоохон өөрчлөлт хийж эх дэлхийгээ аврахгүй бол 2035 он гэхэд бид өөр гариг руу нүүхээс өөр аргагүй болох нь ээ.  

      Үүнийг дагаад хүн төрөлхтөн орших уу, эс орших уу гэсэн асуулт урган гарахаар болоод байна. Одоо хүн төрөлхтөнд хамгийн их аюул занал учруулж буй зүйл бол дулаарал. Эх дэлхий маань дотроосоо халан тийчэлж байна шүү дээ. Дулаарлаас шалтгаалсан хойд туйлын  мөс хайлаад арлын орнуудыг живүүлнэ гэсэн олон жилийн өмнөх аймшигт яриа  яг бодит биелэлээ олоход ойрхон байна. Биднийг хөгжлийн төлөө өдөр шөнөгүй зүтгэж байх хооронд эх дэлхий маань ч сөнөх нь, бид ч бас орох оронгүй болох нь ээ. Одоо тэгвэл яах вэ. Эх дэлхийгээ болон хүн төрөлхтөнөө аврахын тулд бүгдээрээ сэтгэл зүрхээрээ нэгдэн тэмцэх ганц л гарц байна. Өөр ямар ч арга алга. Учир нь, дэлхийг мөхөлд түлхэж байгаа гол буруутан нь хүн, аварч чадах нь  бас л хүн өөрөө.

        Чухамдаа хүн төрөлхтөнийг гамшгийн хэмжээнд очсон уур амьсгалын өөрчлөлтөд анхаарлыг нь хандуулах зорилгоор Дэлхийн байгаль хамгаалах сангаас анх 2007 онд санаачлан “Эх Дэлхийн цаг” хэмээх арга хэмжээг зохион явуулж эхэлсэн юм. Энэ арга хэмжээний гол үйл явдал нь нэг цагийн турш гэрлээ унтраах. Ингэснээр эх дэлхийгээ аврах тэмцэлд та өөрийн биеэр оролцох боломж гарч байгаа юм.  Анх Австралид зохион явуулсан энэ арга хэмжээ жил ирэх тусам хүрээгээ тэлж олон улсын анхаарлын төвд зүй ёсоор ороод байна. 2008 онд болсон “Эх Дэлхийн цаг”-т зургаан тивийн 36 сая гаруй хүн биечлэн оролцжээ. Түүнчлэн сэтгэл зүрхээрээ энэ арга хэмжээг дэмжсэн хүний тоо 60 сая хол давжээ. Энэ үеэр дэлхийд алдартай Америкийн “Эмпайр стэйт билдинг”, Чикагогийн “Алтан гүүр”, Австралийн Сиднейн Дуурийн театр, Италийн Ромын Коллизей зэрэг олон барилга байгууламжийн гэрлийг нэг цагийн турш унтрааж иргэдийн анхаарлыг татаж чадсан юм. Эх дэлхийнхээ төлөө гэсэн ариун зорилготой энэ арга хэмжээнд 2017 онд дэлхийн 187 орны гурван тэрбум гаруй хүн оролцсон байна. Энэ нь хүн төрөлхтөний түүхэнд хамгийн олон хүн зэрэг оролцсон арга хэмжээ болж чадсан билээ.

      Нэг цагийн турш гэрлээ унтрааснаар цахилгаан хэмнэж дэлхийн дулааралд нөлөөлөх нь “Эх дэлхийн цаг”-ийн гол зорилго биш, тэгэх боломж ч байхгүй. Харин иргэн та гэрлээ нэг цаг унтрааж “Эх дэлхийн цаг”-т оролцож байна гэдэг л өөрөө том амжилт, эр зориг юм. Бас амьдран буй дэлхийнхээ өмнө хүлээх хариуцлагаа ухамсарлаж буйгаа нотолж байгаа хэрэг. Үнэндээ эх дэлхийгээ хайрлан хамгаалахыг сэтгэл зүрхэндээ хүсч явдаг олон сая хүн бий. Даанч тэд яах учраа олохгүй хий дэмий мөрөөдөөд л явдаг.  Дэлхийн байгаль хамгаалах сан “Эх дэлхийн цаг”-ийг зохион явуулснаар ийм хүмүүст боломж олгож байгаа юм.

       Энэ жилийн уриа “Ирээдүйдээ гэрэл нэмье”. Та энэ арга хэмжээнд нэгдсэнээр дэлхийнхээ төлөө, цаашлаад өөрийнхөө ирээдүйн төлөө тэмцэх боломжтой болно. Бас заавал гэрлээ унтраах ч албагүй. Наад зах нь энэ өдөр (“Эх дэлхийн цаг 2022”: 3 дугаар сарын 26-ны Бямба гаригт Улаанбаатарын цагаар 20:30-нд эхлэнэ)  усны хэрэглээгээ багасгачихад л таны хувь нэмэр болно. Автомашинаа уналгүй явган алхаж, хуванцараас татгалзахад та эх дэлхийгээ хамгаалах үйлсэд хувь нэмрээ оруулж ирээдүйдээ жинхэнэ утгаараа гэрэл нэмнэ. Дэлхий байхгүй бол бид ч байхгүй шүү дээ, эцсийн дүнд.