Зуу зуун ном, дэвтэр, өдий төдий ном товхимол эзэнгүй үлдлээ. Номын өргөөнөө суугаад орчуулгаа хийж байсан эгэл даруухан атлаа эгэлгүй сод тэр эрдэмтний залуу идэр, буурал болчихоод ч тэнхээ мэдэн номын хуудас эргүүлж, өдөржин бичгийн ширээнээ тонголзон суусан нь ердөө хэдхэн оны л өмнө байх. Он цаг туулж суухад урт юм шиг хэр нь туулаад барсан хүнд түүн шиг богино, давчуу, харгис зүйл үгүй болов уу. Гэхдээ юм хийж амжуулсан хүнд арай өөрөөр, магад амралт мэтээр, өөр тийш явах аяллын цаг ирсэн мэтээр мэдрэгддэг байж болох юм. Тиймдээ ч өдийд тэр хамгийн үнэт бүтээлийг нь орчуулан Монгол түмний оюун, мэлмийд хүргэсэн Габриал Гарсиа Маркестай уулзчихсан, үйлс бүтээлийнхээ тухай бахархал дүүрэн ярьж суугаа байх. “Зуун жилийн ганцаардал” бол лут, сод, онцгой, ер бусын, хосгүй бүтээл билээ. Тийм гайхамшигт бүтээлийг яруу сайхан эх хэлнээ амттайхан буулгасан хүмүүн бол Соёлын гавьяат зүтгэлтэн, нэрт дуун хөрвүүлэгч, сэтгүүлч, судлаач Г.Аким.  

     Олон сайхан зохиолыг авьяас, нөр их хөдөлмөрөөрөө дамжуулан бидэнд хүргэсэн оюун санааны “гүүр” түүнд хүнтөрөлхтөн, тэр дундаа ахан, дүүс нь болж явсан монголчууд бид баярлаж, бахдан дуулахаас аргагүй. Одоо ч түүний нэгэн насныхаа он цагт хийсэн орчуулга, бүтээл бидний номын санд, ширээн дээр өрөөтэй байхад яаж бид түүнийг дуулахгүй, дурсахгүй, үгүйлэхгүй байх билээ. Эндээс явсан цаг мөчөөсөө л тэр бидэнд үгүйлэгдэж, сод нэгэн эрдэмтэн нь бурхан зүг одсон нь уншигчдын зүрхэнд уйтай байна. 

        Тэрээр 1942 онд Дорнод аймгийн Матад сумын Тэмээт гэдэг газар төрсөн. Зохиолч, сэтгүүлч, орчуулагч, түүхч тэрбээр 1990-2000 онд “Ил товчоо” сонины Ерөнхий эрхлэгчээр ажиллаж, Монголд чөлөөт хэвлэлийг хөгжүүлэхэд хувь нэмрээ оруулсан нэгэн юм. Мөн 2005-2010 онд Үндэсний номын сангийн захирлаар ажиллаж байсныг номд шимтэгч хэн бүхэн андахгүй. Л.Гумилевын “Хар домог”, Ч.Айтматовын “Цаазын тавцан”, “Зуун жилийн ганцаардал”, “Ундаассан бурхад” зэрэг 16 ном, бүтээлийг орос, англи хэлнээс орчуулсан. Мөн эрдэмтэн зохиолч, нэрт орчуулагч Б.Ринчен судлалаар “Билгүүн номч Бямбын Ринчен” зэрэг дөрвөн ном эмхэтгэн хэвлүүлжээ. Мөн “Цэцэн билгийн сувд эрхи” (англи-монгол, монгол-англи цэцэн үгийн толь), “Хамбын овооны яс юу өгүүлнэ вэ?”, “Тэнгэрийн нохой”, “Чингисийн оюун билгийн соёрхол”, "Хөрстөд ганц Чингис Хаан" буюу Хөх Монголчуудын өлзий учрал), “Туульс хайлдаг уулс 1, 2”, “Шашдирын чуулган 1, 2, 3”, “Чингис хааны сүлд буюу эргэсэн хасын утга”, “Хаднаа шингэсэн аялгуу оршивой” зэрэг 30 гаруй ном туурвисан юм. Ердөө түүний бүтээл туурвилаас багаханыг дурдахад ийм байна.