Эрүүл мэндийн сайд С.Чинзориг цаг үеийн асуудлаар мэдээлэл хийлээ.

     Тэрбээр “Сүхбаатар аймгийн Нэгдсэн эмнэлэгт нохойд хазуулсан, нэр бүхий есөн иргэнд галзуу өвчний эсрэг вакцин хийх гэж байгаад андуурч, сүрьеэгийн вакцин тарьсан хэрэг гарсан байна. Ажилтан андуурсан уу, хариуцлага алдсан уу гэдгийг нь тогтооно. Мэргэжлийн ноцтой алдаа гаргасан үйл явдал боллоо. Нохойнд хазуулсан иргэнд гурван удаа вакцин хийдэг. Тэгэхдээ галзуугийн шинж тэмдэг илрэх эсэхийг 90 хоног ажигладаг юм байна. Хүүхдэд 0.1мл хэмжээтэй буюу маш бага тунгаар хийдэг вакциныг өндөр тунтай хийсэн ноцтой алдаа гаргажээ. Нохойд хазуулсан иргэдийн гуравт нь гурван удаагийн сүрьеэгийн вакцин хийсэн. Энэ нь нэг иргэнд вакцины хийх хэмжээг 30 дахин нэмэгдүүлсэнтэй дүйцэх юм. Мөн дөрвөн хүнд хоёр удаа буюу 20 дахин нэмэгдүүлсэн, хоёр хүнд нэг удаа сүрьеэгийн вакцин хийсэн байна.

Эдгээр иргэнд хийсэн вакцины сөрөг нөлөөг тандалт судалгааны үндсэн дээр тогтооно. Мөн Эрүүл мэндийн газарт хадгалж байсан вакциныг авч, аймгийн Нэгдсэн эмнэлэг иргэдэд хийснийг гайхаж байна. Вакциныг Эрүүл мэндийн газраас вакцин хүлээж авахдаа төрөл, зориулалтаар нь хүлээж авсан эсэхийг тогтоох шаардлагатай.  Аливаа төрлийн тариаг иргэнд хийхдээ тарианы нэр, хадгалах хугацааг хардаг. Ажлаа аваад нэг хонож байгаа ч тодорхой ажлуудыг хийж эхэлсэн. ЭМЯ-ны Төрийн нарийн бичгийн даргын тушаалаар Сүхбаатар аймагт мэргэжлийн баг ажиллахаар болсон. Энэ баг хоёр чиг үүрэгтэй ажиллана. Эдгээр вакцины сөрөг үр дагаврын үр нөлөөг тандалт судалгаагаар тогтооно. Мөн хадгалж буй вакциныг шалганах үүрэг хүлээгээд байна" гэлээ.