Засгийн газрын ээлжит хуралдааны үеэр Гадаад харилцааны  дэд сайд Б.Мөнхжинг чөлөөлж, оронд нь “Монцамэ” агентлагийн даргаар ажиллаж байсан Г.Амартүвшинг дэд сайдаар томилжээ. Гомбосүрэнгийн Амартүвшин нь 1998 онд нийслэлийн нэгдүгээр дунд сургууль, 2004 онд Монгол Улсын Их Сургуулийн Гадаад хэл соёлын сургуулийг төгсөж, 2012 онд Австралийн Дикений их сургуульд Олон улсын харилцааны магистрын зэрэг хамгаалсан байна.

     Нидерландын Хаант Улсын Олон улсын харилцааны Клингендалийн институт, Швейцарын Холбооны Улсын Европ судлалын үндэсний судалгааны хүрээлэнд олон улсын харилцааны чиглэлээр, Европын Холбоо, АСЕАН-ы бүсийн чуулга уулзалт хамтарсан “Урьдчилан сэргийлэх дипломат үйл ажиллагаа ба зуучлал” зэрэг сэдвээр тус тус 10 гаруй мэргэшил дээшлүүлэх судалгааны хөтөлбөрүүдэд хамрагдаж байсан судлаач. Аюулгүй байдал, олон улсын эрх зүй, хүний эрх болон мөргөлдөөн зохицуулалт сэдвээр мэргэшсэн байна.

·2004-2005 онд Гадаад хэргийн яамны Төрийн захиргааны удирдлагын газарт мэргэжилтэн, Атташе,

·2005-2006 онд Гадаад хэргийн яамны Европын газарт Атташе,

·2006-2007 онд Гадаад хэргийн яамны Олон талт хамтын ажиллагааны газарт Атташе,

·2007-2008 онд Гадаад хэргийн яамны Америк, Ойрхи Дорнод, Африкийн газарт Атташе,

·2008-2010 онд Монгол Улсаас Канад Улсад суугаа Элчин сайдын яамны 3 дугаар нарийн бичгийн дарга,

·2010 онд Гадаад харилцааны яамны Стратегийн төлөвлөлт, хяналт шинжилгээ, үнэлгээний газарт 2 дугаар нарийн бичгийн дарга,

·2012 онд Гадаад харилцааны яамны Бодлого төлөвлөлт, судалгааны газарт 2 дугаар нарийн бичгийн дарга,

·2012-2014 онд Гадаад харилцааны яамны Бодлого төлөвлөлт, судалгааны газрын Дэд захирал,

·2014-2016 онд Гадаад харилцааны яамны Бодлого төлөвлөлт, зохицуулалтын газрын Захирал,

·2017 оноос Тусгай үүрэг гүйцэтгэгч Элчин сайд,

·2017-2018 онд Гадаад харилцааны яамны Хөрөнгө оруулалтын судалгааны төвийн захирал, Тусгай үүрэг гүйцэтгэгч Элчин сайд,

2018-2020 онд Гадаад харилцааны сайдын зөвлөх, Тусгай үүрэг гүйцэтгэгч Элчин сайдаар тус тус ажиллаж байсан.

     Тэрбээр 200 сая төгрөгийн орон сууцтай “Сэнтрал экпресс СиВиЭс” ХК, “Эрдэнэс таван толгой” ХК, “Эрдэнэс таван толгой ХК, “Би Хэалти сапплайс” ХХК, “Перфишенси менежмент” ХХК-нд хувьцаа эзэмшдэг байна. Мөн түүний нэг сарын орлого 21 сая 790 мянган төгрөг бол гэр бүлийн орлого нь 200 сая төгрөг аж.