ЕРӨНХИЙ САЙДАД ХӨРӨНГӨ ОРУУЛАЛТ ХИЙХ САНАЛ ТАВЬЖ, ТӨСВИЙГ НЬ ШИЙДВЭРЛЭСНЭЭР ЗАСВАР, ӨРГӨТГӨЛ ШИНЭЧЛЭЛИЙН АЖИЛ ЭХЭЛСЭН

    Сүүлийн үед цахим сүлжээнд “Улсын хэмжээнд үйл ажиллагаа явуулж байгаа Эх хүүхдийн эрүүл мэндийн үндэсний төвийн гадна зургуудыг тавьж барилга нь нурах гэж байна, ээжүүд коридорт хэвтэж байна” гэх ташаа мэдээлэл цацагдах болсон. Энэ талаар бид Баянгол дүүргээс сонгогдсон гишүүн Х.Ганхуягаас тодруулж тус төвд хэрхэн анхаарч ямар ажил хийж байгаа талаар тодрууллаа. 

    Тэрбээр “Өнгөрсөн 2021 оны зургадугаар сард Ерөнхий сайд Л.Оюун-Эрдэнэ Баянгол дүүрэгт ажилласан. Энэ үеэр ЭХЭМҮТ-ийн үйл ажиллагааг танилцуулж засвар шинэчлэлийн ажил хийх санал тавьсны үндсэн дээр улсын төсвийн хөрөнгө оруулалтаар 2022 оноос эхлэн зургаан багц ажлыг хийж байгаа. Үүнд, төрөх тасгийг иж бүрэн шинэчилж дэлхийн жишигт нийцүүлж байна. Ингэхдээ ээжүүд усанд төрөх боломжтойгоос эхлээд гэр бүлийн хүнтэйгээ хамт байх, катерингийн үйлчилгээ авах, ганцаараа нэг өрөөнд төрөх боломжтой болсон. Хуучин шиг 3-4 ээж нэг өрөөнд  ар гэр нь гадаа бараг л газын плитк дээр шөл цай буцалгадаг үе ард хоцорсон. Төрөх тасаг болон хүүхдийн мэс заслын тасгуудыг энэ мэтээр бүгдийг нь шинэчилсэн. 

     Мөн 38 жил болж байгаа барилгын шугам хоолой ямар байх вэ. Зарим газраа бохир нь задарч өтгөн шингэнтэйгээ холилдсон ганц нэг удаагийн торгоох төдий засвараар өнөөдрийг хүрсэн. Үүнийг бүгдийг нь сүүлийн үеийн болгож шинэчилж байна. Бүх лифтийг шинээр угсарч байгаа.

Хүүхдийн  болон нөхөн үржихүйн зөвлөх поликлиник гээд хоёр том өргөтгөлийн барилга ажилчдын хүүхдийн цэцэрлэг баригдаж байна. Дээрх ажлууд эхнээсээ дууссан. Зарим нь энэ ондоо багтаад бүрэн дуусахаар байгаа. Цахим сүлжээнд явж байгаа мэдээлэл бол ташаа гэдгийг үүгээр хэлье. Миний тухайд эхнэр хүү хоёр маань хэвтэж байх үед үнэхээр хүнд нөхцөлтэй байсан тул Баянгол дүүрэгт байгаа томоохон эмнэлгүүд, өрхийн эрүүл мэндийн төвүүд гээд энэ салбарт онцгой анхаарч ажиллаж байна. Цаашид ч анхаарах ажиллах болно. Иргэдэг чанартай хүртээмжтэй эрүүл мэнд боловсролыг олгох амлалт өгч байсан үүндээ зорин ажилласаар байна” гэлээ. 

     2021 оны зургадугаар сард Баянгол дүүрэгт ажиллахдаа Ерөнхий сайдад хөрөнгө оруулалт хийх санал тавьж төсвийг нь шийдвэрлэснээр 2022 оноос зургаан багц засвар өргөтгөл шинэчлэлийн ажил хийгдэж эхэлсэн.