“Улаанбаатарын Хавар  2026”  Нийслэлийн соёл, урлагийн өдөрлөгийн үеэр болсон “The Open Mic Mongolia” өдөрлөг дээр өөрийнхөөрөө дуулж, бүжиглэж байгаа охины бичлэг олон хүний хайрыг татаж, эерэг хандалт авсаар байгаа юм. Түүнийг Н.Намжилмаа гэдэг бөгөөд 16 настай, 11 дүгээр ангийн сурагч ажээ.

-Чиний “The Open Mic Mongolia” өдөрлөг дээр дуулсан дуу олон хүнд хүрч, эерэг сэтгэгдэл авсан байна лээ, баяр хүргэе. Тухайн өдрийн талаар ярихгүй юу, дуулж байгаа дүрс бичлэг нь тренд болсон байгааг харах ямар байсан бэ?  

                -Анх найзуудтайгаа зүгээр л хөгжилтэй байдлаар дуулах гэж очоод хамгийн түрүүнд нь бүртгүүлсэн. Би ер нь бүхний түрүүнд байх дуртай, манлайлах хүсэл мөрөөдөлтэй. Дуулж байгаа бичлэгээ тэгж их хандалт авч, хүмүүст хүрч байгааг нь эхлээд мэдээгүй ээ. Эгч маань над руу явуулсны дараа л мэдсэн. Хүмүүсийн эерэг сэтгэгдэл, урмын үгсийг уншаад маш их баярласан.

-Өөрийн дуулж байгаа дүрс бичлэгээ цахим орчинд тавих, тайзан дээр гараад олон хүний өмнө дуулах хоёрын ялгаа хэр мэдрэгдсэн бэ?

                 -Дуулж байгаа бичлэгээ олон нийтэд нийтлүүлсэн нь анхных биш ч анх удаа өөрийгөө өхөөрдсөн . Өөрөө бичлэг хийж бусдад түгээх нь алдаагаа засах эсвэл ахин эхлүүлээд бичих зэргээр илүү амар санагддаг. Хүмүүсийн урд тэднийг мэдэрч, хүмүүстэйгээ хамт дуулах нь илүү сэтгэлд дулаахан байдаг юм билээ. Тайзан дээр гарах тусам л илүү аз жаргалтай болж, дуугаа муу дуулах вий гэж биш харин хэрхэн үзэгчдэд болон өөртөө хөгжилтэй байдлаар дуулах вэ гэж боддог болсон.

-Хэдэн настайгаасаа авьяасаа нээж, дуулж эхэлсэн бэ?  

                  -Бага байхын л авьяастайгаараа дуудуулж, магтуулдаг байсан даа. Уран уншлага, уран нугарах, монгол болон чөлөөт бүжиг зэрэгт эвсэлтэй. Өдөр өнгөрөх тусам улам их урлагт дурлаж, тэр тусмаа дуулах илүү дуртай болсон. Хэлд орсноосоо л хойш бараг дуулсан гэхэд хилсдэхгүй байх.

-Хэддүгээр ангийн сурагч вэ, ямар мэргэжил эзэмшихийг зорьж байна. Дуучин болох уу?

                -Би одоо IV сургуулийн 11 дүгээр ангийн сурагч. Мэргэжил сонгоход надад их хэцүү байсан. Дуулах дуртай, дуучин болно гэж удаан мөрөөдсөн ч надад энэ чиглэлээр амьдрах хэцүү, хийсвэр мөрөөдөл гэж хэлсэн хүн цөөнгүй бий. Тиймээс одоогоор хуульч эсвэл эрх зүйч болох төлөвлөж байгаа. Гэхдээ би дуулах хүсэлтэй хэвээр, үүнийгээ ч хөгжүүлсээр байх болно гэж боддог.

-The Voice Kids Mongolia шоунд орж байсан шүү дээ. Тус шоуны талаар ярихгүй юу. Өөр тэмцээн, уралдаанд орох бодол бий юү?

                   -2024 онд The Voice Kids Mongolia шоунд оролцож, өөрийгөө сорьж үзсэн. Одоо бол дүүрэг, сургуулийн тэмцээн зэрэгт оролцоод явж байгаа. Дуулах мөрөөдөлдөө хийсэн хамгийн том алхам бас бүтээсэн хамгийн гоё дурсамжуудын минь нэг байсан. Тухайн үед 14-тэй байсан болохоор ч тэр үү бага зэрэг сандарсан байх гэж боддог юм. Гэрийнхэн маань бүгд намайг дэмжээд ард минь зогсож байсан үеийг бодоход сэтгэлд үргэлж сайхан мэдрэмж төрүүлдэг.

THUNDERZ АХТАЙ ХАМТРАН АЖИЛЛАЖ, 146 РЕКОРДОСЫН УРАН БҮТЭЭЛЧ БОЛОХЫГ ХҮСДЭГ

                -Би дуу дагаж дуулах эсвэл “өөрийн” болгож дуулах дуртай. Жишээлбэл, өнгөө өөртөө тохируулан дээгүүр авах, нугалаа болон донж нэмж, өөрийнхөөрөө дуугаа мэдэрч дуулдаг.  Дуугаа илүү сайн, сонирхолтой дуулдаг гол шалтгаануудын нэг нь өөрөөрөө дуулдагтай холбоотой байх.

-Дуу хөгжим таны хувьд юу вэ?

                -Дуу хөгжим бол миний амьдралын хамгийн том хэсэг. Миний өөрийгөө илэрхийлэх маш том хэлэмж бөгөөд намайг тодорхойлох гол зүйлүүдийг нэг. Жаахан байхаас минь сайхан гэсэн бүх дурсамжууд минь дуутай холбогдсон байдаг. Дуу хөгжим миний бусадтай холбогдох холбоос, гүүр болж өгдөг.

-Үлгэр дуурайлал авдаг уран бүтээлч бий юү?

                   -Thunderz ахыг би олон уралдаанд шантралгүй тууштай оролцож байсан учраас хүндэлж, биширдэг. Өөрийн гэсэн үзэл бодолтой, олон талын авьяас чадвартай, хувь хүн талаасаа ч зөв хүн юм шиг санагддаг. 146 продакшнд орж, хамтарч ажиллахыг хүсдэг.

 -Ямар ч үед амандаа аялж, дуулдаг дуу бий юү?

                  -Open mic дээр дуулсан дууг байнга аялаастай байгаа. Гэхдээ удахгүй өөр дуугаар солигдох байх. Олон төрлийн өөр өөр дуу мэддэг, сонсдог болохоор ч тэр үү дандаа өөр өөр дуу толгойд эргэлддэг дээ.

 -Ирээдүйн зорилго мөрөөдлөөсөө хуваалцвал?

                -Ирээдүйн холын зорилго гэвэл эрх зүйч болж тайван сайхан амьдрах. Харин мөрөөдөл гэвэл тэс өөр. Дуугаа дуулж өдөр бүрийг хүссэн зүйлээ хийж амьдрах. Амьдралыг тултал нь жаргалтай өнгөрүүлэх. Ер нь хүн бүрийг би ажлаасаа аз жаргалыг мэдэрдэг байгаасай гэж хүсдэг. Тийм хүмүүс миний хувьд хамгийн их азтайд тооцогддог.