Нийслэлийн хүн амын мах, махан бүтээгдэхүүнийг тогтвортой байлгах зорилгоор ХХААХҮЯ-аас мах бэлтгэлийн компаниуд дунд сонгон шалгаруулалт явуулсны үндсэн дээр нийт 12 байгууллага иргэдэд хаврын улиралд нөөцийн мах нийлүүлэхээр ажиллаж байна. Нөөцийн хувьд 30 хувь нь үхэр, 65 хувь нь хонь, таван хувь нь ямааны мах байгаа ажээ. Бид нөөцийн махны эргэн тойронд дараах сурвалжилгыг Чингэлтэй дүүргээс бэлтгэлээ.

Нөөцийн махыг 431 цэгт худалдаж байна

      Хаврын хаварт нөөцийн махны асуудал үүсэж, амт чанаргүй, хүртээмжгүй, үнэтэй байна зэрэг шүүмжлэлд өртдөг билээ. Тэгвэл 12 аж ахуйн нэгж, 7900 орчим тонн махны нөөцийг бэлтгэж, худалдаанд гаргажээ. Нөөцийн махыг гуравдугаар сарын 15-наас нийслэлийн есөн дүүргийн 431 хүнсний дэлгүүрээр худалдан борлуулж эхэлсэн байна. Үнийн хувьд үхрийн ястай мах 10700 төгрөг, хонины ястай мах 8600 төгрөг, ямааны ястай мах 6400 төгрөг буюу зах зээлийн ханшаас 2000-3000 төгрөгөөр хямдаар борлуулагдаж байгаа аж.

       Нөөцийн махны асуудлаад УБЗАА-ны Худалдаа, үйлчилгээний асуудал хариуцсан мэргэжилтэн Н.Бумцэнд тайлбар өгөхдөө “Нөөцийн мах борлуулах цэгийн тоог дүүрэг, хороодын хүн ам, байршил зэргийг харгалзан тогтоосон. Дунджаар нэг хороонд 2-3 дэлгүүр ноогдож байгаа. Борлуулалтын цэгүүдийг сонгохдоо тухайн дэлгүүрийн санхүүгийн чадамж, хөргөгч, хөлдөөгчийн багтаамж болон татварын цахим системд холбогдсон, эсэх зэрэг үзүүлэлтийг харгалзсан. Нөөцийн хувьд 30 хувь нь үхэр, 65 хувь нь хонь, таван хувь нь ямааны мах. Нийслэлийн зүгээс нөөцийн махны худалдааг хариуцан ажиллана. Үүнтэй холбогдуулан нөөцийн махны хадгалалт, чанар, аюулгүй байдал, савлагаанд хяналт шалгалт хийж, худалдаанд гаргах бэлтгэл ажлыг хангасан. Махны борлуулалтаас хамаараад худалдах цэгүүдийг нэмэх боломжтой” гэсэн юм.

       Бидний очсон Чингэлтэй дүүргийн гуравдугаар хорооны гурван дэлгүүрт нөөцийн мах борлуулж байлаа. Эрэлт ихтэй, иргэд ам сайтай байгаа ажээ. Хэдийгээр өнгөрсөн жилийнхээс үнэ бага зэрэг өссөн ч амт чанартай, өнгө үзэмж сайтай, шим тэжээлтэй, шинэ байгаа нь худалдан авагчдад таатай байгаа гэнэ.

Чингэлтэй дүүргийн гуравдугаар хороонд байрлах “Хараат” маркетаар орлоо. Гурван ч хүн нөөцийн мах аваад зогсож байв. Тэд “Энэ жил чинь нөөцийн мах элбэг, өнгө зүс сайтай давгүй байна. Өмнөх жилүүдэд заримдаа ямар ч өөх, тосгүй, өнгө үзэмжгүй байдаг байсан” гэж ярьцгааж байлаа.

ИРГЭН Н.ГАНЧИМЭГ: НӨӨЦИЙН МАХ ХҮЛЭЭЛТЭД ХҮРЧ БАЙНА

      Бид Чингэлтэй дүүргийн гуравдугаар хорооны иргэн Н.Ганчимэгээс нөөцийн махны асуудлаар тодруулахад “Нөөцийн махны хувьд хүлээлт өндөртэй байлаа. Энэ жил нөөцийн мах элбэг байх шиг байна. Өмнөх жилүүдэд нөөцийн мах нь олдохгүй иргэд хэл, ам их хийдэг байсан. Энэ жил сонголт сайтай, хүртээмж ихтэй байна. Махны чанарын хувьд нэлээн дажгүй, өнгө зүстэй боломжийн харагдаж байна. Хэдийгээр иргэд хямдхан мах авч байгаа ч гэсэн бусад худалдааны махтай адилхан байх ёстой гэж боддог. Хямдхан гээд муу мах идэж болохгүй шүү дээ. Энэ жил бэлтгэн нийлүүлэгчид болон албаныхан нөөцийн маханд онцгой анхаарал хандуулсан байна гэж бодож байна. Миний хүлээлтэд хүрч, өндөр оноо авч байна” гэлээ.

ХУДАЛДАГЧ А.БААСАНЖАВ: “Мах Импэкс” болон “ХКҮ” компанийн нөөцийн мах нийлүүлэлт сайтай байгаа

          Харин “Хараат” маркетийн худалдагч А.Баасанжав хэлэхдээ “Манай энэ хавийн хүмүүсийн хувьд нөөцийн мах их эрэлттэй байдаг. Өмнө жил олдохгүй байна гээд хүмүүс их бухимдалтай байдаг байсан. Харин энэ жил хангалттай хүрэлцээтэй байна. Мөн энэ жилийн хувьд “Мах Импэкс” болон “ХКҮ” компанийн нөөцийн мах нийлүүлэлт сайтай байгаа. Иргэд үндэсний үйлдвэрлэгч компанийн нийлүүлсэн махыг худалдан авах дуртай байна. Өнгөрсөн жил манай дэлгүүрт өөр компани махаа нийлүүлж байсан. Нийлүүлэлт өндөр учраас иргэд хэрэгцээндээ тааруулж, бага багаар нөөцийн махаа худалдан авч байна” гэлээ.