Сэтгүүлч Н.Өнөрцэцэгийн ар гэрийнхэн мэдээлэл өглөө.

               Түүний аав С.Наран “Монгол Улсын Ерөнхийлөгч, Ерөнхий шүүгч нараас охиныг минь гадуур шалгаж өгөөч гэж хүсэж байна” гэв.

            Дүү Н.Амгаланбаяр “Миний эгч бол улсдаа хувь нэмэр оруулсан хүн. Хөгжлийн банк, ЖДҮ, ногоон автобус гээд сурвалжлаагүй, ажлаагүй зүйл байхгүй. Иргэдийн мэдэх эрхийн төлөө бүгдийг нь ажил мэргэжлийнхээ хүрээнд мэдээлж байсан. Ингэж явсан эгч минь өнөөдөр торны цаана сууж байна. Мэдээж арван хуруу тэгш хүн гэж байхгүй. Хууль, шүүхэд би буруу өгч байгаа хэрэг биш. Найман ишигний хэрэг байна уу, бусдын нэр хүндэд халдсан нь ч байна уу хуулийн хариуцлага хүлээх нь зүйн хэрэг. Өөрөө ч эгч минь "Сайн шалга, хариуцлагаа хүлээнэ" гэж хэлж байгаа. Хамгийн гол нь гадуур хуулийн хүрээндээ шалгаад явахад тусалж өгөөч. Манай гэр бүлээс ч гэсэн бүгд очиж уучлалт гуйхад бэлэн байна. Хүүхдийн эрх ашиг гэх зүйл манай улсад байхаа больсон юм байна. Эгчийн минь хоёр хүүхэд хоёулахнаа байдаг. Бага хүү нь “Ээж сар хөдөө яваад ирнэ гэсэн. Ээж ирэхгүй байна” гэж уйлаад шөнө унтахаа больсон. Аав, ээж хоёр минь мөн даралт нь ихсээд, шөнөжин уйлаад, өглөө босоод даралтыг нь үзэхээр 180-160 хооронд хэлбэлзэж байна. Тиймээс хууль хүчний байгууллагад бид мэхийн ёсолж, эгчийг минь суллаад өгөөч гэж гуймаар байна. Ингэснээр ялаас мултарч байгаа хэрэг биш, хуулийн хүрээнд гадуур шалгаж өгөөч гэж хүсэж байна” гэв.