Нийслэлийн Хан-Уул дүүргийн III хорооны нутаг дэвсгэрт байрлах 10 давхар барилгын дөрвөн давхарт гал гарч, долоон иргэн нас барсан талаар бид мэдээлсэн. Үүнтэй холбоотойгоор гал гарсан шалтгаан, нөхцөл болон бусад асуудлын талаар Хан-Уул дүүргийн цагдаагийн I хэлтсийн дарга, дэд хурандаа Д.Дашнямаас тодрууллаа.

Тэрбээр “Цагдаагийн байгууллагын тусгай дугаарын утсанд арванхоёрдугаар сарын 19-ний өдрийн 07:06 цагт Хан-Уул дүүргийн III хорооны нутаг дэвсгэрт байрлах “Сутай” хотхонд гал гарч байна гэх дуудлага, мэдээлэл бүртгэгдсэн. Дуудлагын дагуу цагдаагийн байгууллагын алба хаагчид хэргийн газарт ирж ажиллаж байна.

                 Шалгалтын явцад нэг айлын хоёр настай, таван настай, 10 настай гурван хүүхэд, 39 настай, 40 настай хоёр эмэгтэй амиа алдсан нь тогтоогдсон. Угаарын хийн улмаас 27 настай, 40 настай хоёр иргэн яаралтай тусламжаар эмнэлгийн байгууллагад хүргэгдэж очоод нас барсан. Цагдаагийн байгууллагаас холбогдох шалгалтын ажиллагааг хийж байна. Онцгой байдлын байгууллага дуудлагыг хүлээж аваад Хан-Уул дүүргийн Гал түймэр унтраах 14 дүгээр ангийн бүрэлдэхүүн ирж ажилласан. Бүрэлдэхүүнийг ахалж ажилласан салаан захирагч галыг унтраахаар ажиллаж байхдаа амь эрсэдсэн харамсалтай хэрэг гарсан.

                Урьдчилсан байдлаар гал шинэ жилийн гацуураас гарсан нөхцөл байдал тогтоогдсон. Тиймээс шинэ жилийн баяр дөхсөн энэ үед гацуур болон түүний чимэглэл, гэрлийн цахилгааны аюулгүй байдлыг хангаж, мэргэжлийн байгууллагаас холбогдох зөвлөмж авч, шалгахыг сэрэмжлүүлж байна. Одоогоор угаарын хийнд өртсөн нэг орцны айлуудыг нэг бүрчлэн шалгах, эмнэлгийн тусламж үзүүлэх ажиллагааг үргэлжлүүлж байна” гэв.