МУ-ын Засгийн газраа төвлөрлийг сааруулах, бүс, орон нутгийн хөгжлийн тэнцвэрт байдлыг хадгалах, иргэд орон нутагтаа тогтвор суурьшилтай амьдрах орчин нөхцөлийг бүрдүүлэх зорилгоор 2002 оноос эхлэн “Тогтвортой амьжиргаа” хөтөлбөрийг эхлүүлж “Тогтвортой амьжиргаа 1, 2, 3” төслүүдийг шат дараатай хэрэгжүүлсээр иржээ.

        Тус хөтөлбөр нь иргэдийн оролцоотой төсвийн төлөвлөлтийг бий болгох, иргэд өөрсдөө санаачлан бодит хэрэгцээгээ тодорхойлж, саналаа гарган төсвийн төлөвлөлтөд оролцох тогтолцоог бэхжүүлэх зорилгоор хэрэгжсэн бөгөөд хөтөлбөрийг 2 дахь шатанд буюу 2013 онд МУ Төсийн тухай хуульдаа “Орон нутгийн хөгжлийн сан”-тай байхаар тусгаснаар иргэд жил бүр “Орон нутгийн хөгжлийн сан”-ийн санхүүжилтээр амьдарч байгаа орчноо сайжруулахын тулд юу хийлгэх саналтай байгаагаа жил бүр 1-6 дугаар сарын хугацаанд өгдөг болоод 10 дахь жилийнхээ нүүрийг үзэж байна.

      Хөтөлбөрийн гурав дахь үе шат болох “Тогтвортой амьжиргаа-3” төсөл нь сумдын “Орон нутгийн хөгжлийн сан”-ийн үйл ажиллагааг дэмжих, эрх зүйн орчныг сайжруулах, төрийн албан хаагчдыг чадавхжуулах, иргэдийн оролцоог нэмэгдүүлэх тал дээр онцгойлон анхаарч, олон талт үйл ажиллагааг хэрэгжүүлж иржээ.

         Тухайлбал сумдын “Орон нутгийн хөгжлийн сан”-ийн гүйцэтгэлд жил бүр “Жилийн гүйцэтгэлийн үнэлгээ” хийж ирсэн бөгөөд анхны үнэлсэн жил буюу 2016 онд 330 сумын дундаж оноо 32% байсан бол тус үнэлгээн дээр дүн шинжилгээ хийж олон талт үйл ажиллагаа хэрэгжүүлсний үндсэн дээр 2023 онд нийт сумдын дундаж оноо 71%-д хүрсэн ололт амжилттай байна.

          “Төвлөрлийг сааруулах нь – Бүс, орон нутгийн хөгжил” хэлэлцүүлгээр өнгөрсөн 20 гаруй жилийн хугацаанд “Тогтвортой амьжиргаа” хөтөлбөрийн хүрээнд бий болсон ололт амжилтыг дүгнэх, цаашид энэхүү бий болсон үр дүнг хэрхэн тогтвортой авч явах, түүнийг бусад салбаруудад нэвтрүүлэх талаар хэлэлцүүлгүүдийг хийж байна.

        Өнгөрсөн хугацаанд “Тогтвортой амьжиргаа-3” төслийн хүрээнд нийт 50 гаруй мянган төрийн албан хаагчдыг сургалтад хамруулж, зорилто бүлгийн буюу орон нутгийн 1.6 сая иргэдээс гадна улсын хэмжээнд нийт 3.6 сая иргэнд хүртээмжтэй мэдээ мэдээллийг түгээж, иргэдийн оролцоог нэмэгдүүлэх олон талт үйл ажиллагааг зохион байгуулж, Орон нутгийн хөгжлийн сангийн Удирдлагын мэдээллийн систем болон иргэдээс санал авах “ОНХС” гар утасны аппликейшнийг хөгжүүлж өнгөрсөн хоёр жилд тус аппликейшнээр 600 шахам мянган цахим саналыг авсан байна.

      Түүнчлэн төрийн албан хаагчид төслийн хүрээнд бий болгосон бие даан суралцах цахим сургалтын платформуудыг ашиглалтад оруулж, Орон нутгийн хөгжлийн сангийн эрх зүйн орчныг сайжруулах тал дээр анхаарч ажилласан байна.

  Өнөөдрийн хэлэлцүүлгээр дан ганц “Тогтвортой амьжиргаа-3” төслийн үр дүнгээр хязгаарлагдахгүй Монгол Улсын Засгийн газраас хэрэгжүүлж буй төвлөрлийг сааруулах, орон нутгийн хөгжлийг дэмжих бодлого, гүйцэтгэлд суурилсан урамшууллын механизмыг хэрхэн өргөжүүлэх талаар олон талын эх сурвалж, мэргэжилтнүүд хэлэлцэж байна.