Галын улмаас зургаан хүний эрдэнэт амь эрсдсэн гашуун мэдээтэй өглөө биднийг угтлаа, өнөөдөр. Шинэ жилийн баяр гээд хүн бүр л догдлол баяртай энэ өдрүүдэд дуулдсан хамгийн хатуу мэдээ байлаа. Зургаагийн зургаан амь гэхээр даанч хайран юм аа. 

      Онцгой байдлын албаныхны өгч буй мэдээллээр дөрвөн хүүхэд, нэг том иргэн гал унтраах, аврах ажиллагааны үеэр амиа алдаж, Онцгой байдлын нэг албан хаагч, нэг иргэн угаартсан байдалтай эмнэлэгт хүргэгдээд, албан хаагч нь нас барсан гэнэ. Дөрвөн хөөрхөн хүүхэд гэртээ сууж байгаад л эндчихлээ. Гацуур модны гэрлэн чимэглэлээс үүдэлтэйгээр гал гарсан байж болзошгүй гэсэн. Магад тэд галд өртөхөөс хэдхэн хормын өмнө гацуур модны хажууд инээд цалгиан зогссон байх даа. Шинэ жилийн баяр болох гэж байгаа гээд догдлон хүлээж, ирэх жил илүү сайн сурч, ажиллахаар зорьж байсан нь лавтай. Албан хаагч ч ялгаагүй ажлаа гүйцэтгэж байна, галаас хүн аварна гэсэн итгэлээр л очсон байх. Даанч аль аль нь мэнд гарч чадсангүй. Хэчнээн их аврал ирсэн бол гэж бодохоор л цээж хөндүүрлэж, сэтгэл өвдсөн уйтай өдөр байна.

          Монголчууд бид цөөхүүлээ. Тэгсэн мөртлөө нэг өдөр олноороо ингээд л хоргодоод байх юм гэж үү. Ямар том гарз вэ, хүнээ алдсан, ирээдүй хойч үеэ алдсан ямар хүнд өдөр вэ. Ангийн найзууд, багш, аав, ээж, төрөл төрөгсөд, ойр дотны хэн бүхэнд нь ямар цочирдом мэдээ очиж байна вэ. Тэд одоо ч итгэхгүй байгаа. Тэд битгий гэл бид ч итгэмгүй хүнд, сэтгэл сэмлэсэн мэдээ байна. Дэндүү хайран, харамсам байна. Гэр бүл, төрөл төрөгсөд нь гүн эмгэнэл илэрхийлье. Сайн төрлийг олох болтугай.

Айл бүр ахуйн гал түймрээс болгоомжилж, гэртээ хараа хяналтгүйгээр үр хүүхдээ үлдээхгүй байхыг сэрэмжлүүлж байна.