Тагтаа Паблишингийн зүгээс Монгол улсын Соёлын яаманд хүсэлт гаргажээ. Тухайлбал, “Монгол Улсын Соёлын яамнаас боловсруулсан "Хүүхдийн ном хэвлэн нийтлэл, хэвлэлд тавих шаардлага" нь МУ-ын Үндсэн Хуулинд заасан үг хэлэх, үзэл бодлоо чөлөөтэй илэрхийлэх, хэвлэн нийтлэх эрх болоод соёл урлаг шинжлэх ухааны үйл ажиллагаа явуулах, бүтээл туурвих, үр шимийг нь хүртэх эрх, эрх чөлөөг ноцтой зөрчсөн үйлдэл болохыг сануулж энэхүү гомдол, шаадлагыг соёлын сайд Ч.Номинд хүргүүлэв. Монгол улс 1997 онд "Утга зохиол, урлагийн бүтээлийг хамгаалах тухай" Бернийн конвенцод нэгдсэн улс билээ. Тус яамнаас боловсруулсан стандарт, шаардлагууд нь Бернийн конвенцийн үндсэн зорилтыг шууд зөрчсөн үйлдэл болохыг мөн үүгээр сануулж байна. Соёлын яамнаас боловсруулсан "Хүүхдийн ном хэвлэн нийтлэл, хэвлэлд тавих шаардлага"-ын "Агуулгад тавигдах шаардлага" хэсэг нь МУ-ын ном хэвлэлийн салбар, түүн дотор ажиллаж, туурвин бүтээж буй мянга мянган мэргэжилтэн, уран бүтээлчдийн бүтээн туурвих эрх чөлөөд халдаад зогсохгүй хүүхдийн номын нийт уншигч хүүхдүүдийн сурч судлах, танин мэдэх, боловсрох уугуул эрхийг боосон үйлдэл мөний тул угаас батлан хэрэгжүүлэх ёсгүй зүйл гэж үзэж байгаа аж. Харин тус шаардлагын хоёр дахь хэсэг буюу хэвлэлтийн чанарын стандартыг мөрдүүлэх нь Монгол улсын Соёлын яамны эрх үүрэгт хамааралгүй. Хэвлэх үйлдвэрийн үйлдвэрлэлийн чанарын стандартыг мөрдүүлэх эрх бүхий яам нь тусдаа байдгийг та бүхэн биднээр хэлүүлэх юун. Тиймийн тулд Соёлын яам хариуцсан салбарынхаа олон талт онцлогийг мэдэж, хэвлэлийн газар, хэвлэлийн үйлдвэр хоёрынхоо ялгааг ойлгоно уу гэж хичээнгүйлэн хүсэж байна” гэв. 

Тагтаа Паблишинг ХХК