ШУА-ийн Археологийн хүрээлэн нь нээлттэй хаалганы өдрийн хүрээнд ЕБС-ийн сурагчдад зориулсан төрөл бүрийн арга хэмжээг жилийн туршид зохион байгуулдаг уламжлалтай билээ. Энэ удаад хүрээлэнгийн эрдэм шинжилгээ болон хээрийн судалгааны ажлыг багш, сурагчдад сурталчлан таниулах зорилгоор Ерөнхий боловсролын сургуулиудын бие даалтын долоо хоногийг тохиолдуулан хамтарч ажиллаа.

    Нийслэлийн Баянзүрх дүүргийн 30-р сургуулийн “Түүхийн мэргэжлийн хөгжлийн бүлэг”-тэй хамтран 6-р ангийн 150 орчим сурагчдыг Улаанбаатар хотын нутаг дэвсгэрт орших археологийн томоохон цогцолбор дурсгалуудтай танилцах аяллыг зохион байгуулав.

    Аяллын хүрээнд Сүхбаатар дүүргийн Бэлхийн амны хүннүгийн язгууртны оршуулгын дурсгал, Сонгинохайрхан дүүргийн Ар гүнтийн хүрлийн хожуу үеийн хиргисүүр, дөрвөлжин булш, хүннүгийн оршуулгын цогцолбор дурсгалуудыг танилцууллаа.

   Энэхүү аяллаар сурагчид хичээлийн танхимд үзэж судалсан онолын мэдлэгээ хээрийн нөхцөлд археологийн дурсгал дээр баталгаажуулан таних, дурсгалын гадаад хэлбэр, бүтэц зохион байгуулалт, илэрсэн олдвор хэрэглэгдэхүүний талаарх олон чухал мэдээллийг олж авсан юм.

   Энэ удаагийн аяллын гол ач холбогдол нь археологийн дурсгалыг таньж мэдэх, түүхэн ач холбогдлыг ойлгох, өв соёлоороо бахархах үзэл санаа төлөвшүүлэх, соёлын өвийн боловсролыг дээшлүүлэх, өсвөр залуу үеэр дамжуулан өв соёлоо хамгаалан уламжлах, сурагчдыг судалгаанд суурилсан бүтээлч сэтгэлгээ хандлагатай болоход идэвхжүүлэх болно.

   Улаанбаатар хот орчмын түүх соёлын дурсгалтай танилцах аяллыг ШУА-ийн Археологийн хүрээлэнгийн Хүннү ба эртний улсуудын үеийн судалгааны салбарын эрдэм шинжилгээний ажилтан С.Энхболд, Б.Дашзэвэг нарын судлаачид зохион байгуулж ажиллаа.