Говьсүмбэр аймгийн Сүмбэр сумын Аяганы хонхор багийн нутагт өчигдөр гал гарчээ. Тодруулбал,  “Говьсүмбэр аймгийн Сүмбэр сумаас Дорноговь аймгийн Даланжаргалан сумын чиглэлийн автозамын зорчих хэсэгт ачааны автомашин дээрх нүүрс шатаж байна” гэсэн дуудлага өчигдөр 19:43 цагт Онцгой байдлын ерөнхий газрын дуудлага хүлээн авах утсанд иржээ. Дуудлагын дагуу тус аймгийн Онцгой байдлын газрын Гал түймэр унтраах, аврах 37 дугаар ангийн алба хаагчид гурван км замыг туулан 19:48 цагт гал гарч байсан газарт очжээ. Алба хаагчид “ДаДа Констрашн” ХХК-ийн жолооч Ш-ийн “Фав-СА4250 Шланз” загварын ачааны автомашинд тээвэрлэж явсан 60 тонн нүүрс шатаж байсныг нэг цаг ажиллаж унтраасан байна. Азаар хүний амь нас, автомашин гал түймэрт өртөөгүй аж.

Э.Энхлэн