Эмийн сангуудад хийсэн хяналт шалгалтын талаар мэргэжлийн хяналтын газраас мэдээлэл хийлээ.

          НМХГ-ын Эрүүл мэнд, боловсрол соёлын хяналтын хэлтсийн дарга Д.Цэнд-Аюуш “НМХГ-ын дэд даргын баталсан төлөвлөгөөт бус хяналт шалгалт хийх тухай удирдамжийн дагуу хяналт, шалгалт хийлээ. Нийслэлийн алслагдсан байршилд үйл ажиллагаа явуулдаг 120 орчим эмийн сан байдгаас 92 нь энэ удаагийн хяналт шалгалтад хамрагдлаа.

         Шалгалтад хамрагдсан эмийн сангуудад 25-30 нэрийн импортоор орж ирдэг өргөн хэрэглээний эм болон тариурууд тасарсан байна. Жишээлбэл, бактерийн, мөөгөнцрийн эмүүд, эмнэлгийн хэрэгсэл, дотоодын хоёр эмийн үйлдвэрийн судсаар сэлбэх 10 орчим тарилгын шингэн ховордсон. Өргөн хэрэглээний эмийн судалгаанаас үзэхэд эм ханган нийлүүлэх байгууллагуудаас татан авсан үнийн дүн дээр эмийн сангууд 10-30 хувийн нэмэгдэлтэй байхаар тооцон худалдаалдаг юм байна. Мөн Эм эмнэлгийн хэрэгслийн хяналт зохицуулалтын газраас вирусийн эсрэг эмийн үнийн дээд хязгаарыг тогтоосон байдаг. Уг хязгаараас давсан буюу 350-2500 төгрөгөөр хэтрүүлэн худалдаалж байсан зөрчил илэрсэн. Тухайлбал, Чингэлтэй дүүрэгт үйл ажиллагаа явуулдаг эмийн сангуудаас илэрлээ.

         Хяналт шалгалтын явцад нийт 87 зөрчил илрүүлж, газар дээр нь 36% буюу 42-ийг арилгуулах арга хэмжээ авсан. 22 аж ахуйн нэгж, байгууллагад 45 заалт бүхийн улсын байцаагчийн албан шаардлагаар хугацаатай үүрэг даалгавар өгч, эрх бүхий албан тушаалтны албан даалгаврыг гурван газар өгч, хэрэгжилтэд хяналт тавин ажилласан.

           Эмийн сангийн үйл ажиллагаа явуулах тусгай зөвшөөрлийг эрх бүхий байгууллагаар сунгуулаагүй,  Х.... компанид зөрчлийн тухай хуулиар 3000 нэгжтэй тэнцэх, гарал үүсэл нь тодорхойгүй эм худалдаалсан нэг эмийн санд 1000 нэгжтэй тэнцэх, тусгай зөвшөөрөлгүйгээр иргэнд эм борлуулсан “Ариун монгол” компанид 1000 нэгжтэй тэнцэх хэмжээний мөнгөн торгууль ногдуулсан. Мөн хяналт шалгалтын явцад “Ариун монгол” ХХК-ийн 0.5-1 кг-аар савласан “Норов-7”, “Мана-4” танг Монгол Улсын эм бүртгэлээс хасуулах хүсэлтийг хүргүүлсэн. Учир нь, иргэн, аж, ахуйн нэгж байгууллагууд 500 грамм болон 1 кг-аар савласан зарах нь хаяг шошгын зөрчил үүсгэж байна. Жижгээр савлаж байгаа эмийн үйлдвэр, эм ханган нийлүүлэх байгууллагууд байдаг” гэлээ.