УИХ дахь Ардчилсан намын бүлгээс Төрийн ордонд өнөөдөр цаг үеийн асуудлаар мэдээлэл хийлээ.

Энэ үеэр УИХ-ын гишүүн Ц.Туваан зудын эрсдэлтэй аймгуудад төрөөс дэмжлэг үзүүлэх болон ямар арга хэмжээ авч болох талаар мэдээлэл хүргэлээ.

Тэрбээр “Монгол Улсын Үндсэн хуульд “Мал төрийн хамгаалтанд байна” гэж заасан. Монгол Улсын эдийн засгийн хоёр дахь том салбар хөдөө аж ахуйн салбарын 80-90 хувийг мал аж ахуй эзэлдэг. Гэтэл мал аж ахуйн салбар үндсэндээ гамшгийн байдалд орчихлоо. Монгол Улсын Засгийн газар өнгөрсөн хуралдаанаараа улсын хэмжээнд гамшгийн өндөржүүлсэн бэлэн байдал зарлачихсан талаараа мэдээлсэн. Монгол Улс тэр даяараа эрсдэлд орж байна. Одоо бүгдээрээ нэгдэж гарц гаргалгааны талаар ярих цаг болсон байна. 2000 оны зуднаар хөдөөгөөс Улаанбаатар руу чиглэсэн хөдөлгөөн нэмэгдсэн. 2024 онд энэ байдал давтагдаж, хот руу чиглэх хөдөлгөөн нэмэгдэнэ шүү.

Мал аж ахуй эрсдэлд орохоор  Монгол Улсын хүнсний хангамж,  мах, сүүний асуудал хүнд байдалд орно. Цаашлаад ноос ноолуур бэлтгэдэг үйлдвэрүүдийн түүхийн эдийг хаанаас авах вэ гэсэн асуудлууд ч тулгарна. Тиймээс  бид энэ асуудалд яаралтай арга хэмжээ авч, Түр хороо байгуулах хэрэгтэй байна. Иймд УИХ дахь Ардчилсан намын бүлгээс ээлжит бус чуулган зарлах санаачлага гаргаж байгаа юм. Их хурлын тухай хуульд өөрчлөлт оруулж, эрсдэлтэй цаг үед эрх баригч нам гэлтгүй сөрөг хүчинтэй хамтарч ажиллах шаардлага байна. Мөн дөрвөн зүйл, заалт бүхий Их хурлын тогтоолын төсөл санаачлан өргөн мэдүүлж байгаагаа танилцуулъя.

 Тогтоолын төсөлд

1. Зудын аюул гамшигтай тэмцэх, хор уршиг хохирлыг бууруулах ажлыг эрчимжүүлэх тусгай бодлого төлөвлөгөөг Улсын Их хуралд танилцуулж, хэлэлцүүлэх
2. Зудын аюул гамшигт нэрвэгдсэн хөдөлмөр эрхлэлтийг дэмжих тухай хуулийн 3.1.9-д заасан шаардлага хангаж буй малчин иргэдийн арилжааны банкнаас авсан зээлийн үлдэгдэл төлбөрийг төрөөс нэг удаа хариуцан төлөх тухай хуулийн төслийг боловсруулж Улсын Их хуралд өргөн мэдүүлэх
3. Зудын аюул гамшгийг даван туулсны дараах үеийн нийгмийн амьдралыг хэвийн болгох бодлогын хүрээнд малчин иргэдийг малын тоо толгойн албан татвараас хоёроос доошгүй жил чөлөөлөх хуулийн төслийг боловсруулж Улсын Их хуралд өргөн мэдүүлэх
4. Дээрх заасан арга хэмжээнүүдийг авахын тулд 2024 оны Монгол Улсын  улсын төсвөөс зарцуулах зарлагын хэмжээг гурван их наяд хүртэлх төгрөгөөр танаж бууруулан, 2024 оны төсөвт тодотгол хийх хуулийн төслийг боловсруулж Монгол Улсын Их хуралд өргөн мэдүүлэхийг Засгийн газарт даалгах гэсэн тодорхой арга хэмжээнүүдийг авч хэрэгжүүлэх шаардлага хүргүүлж байгаа юм”  гэлээ.