Засгийн газраас гаргасан хуралдааны зарим шийдвэрийг танилцууллаа.

Энэ үеэр Хууль зүй, дотоод хэргийн сайд Х.Нямбаатар “Ковидын үеийн төсвийг олон нийтэд ил болгох даалгаврыг Шадар сайд С.Амарсайханд даалгасан. Үүнтэй холбоотой Засгийн газрын тогтоол гаргасан учир Шадар сайд С.Амарсайхан ирэх долоо хоногт ковидын үеийн санхүүжилтийг олон нийтэд зарлах үүрэг хүлээсэн. Нүүрсний хулгайн хэргийг мөрдөн шалгах ажиллагаа явуулж байж хэнд ямар хуулийн хариуцлага хүлээлгэх вэ гэдгийн шүүхэд шилжүүлж, олон нийтэд ил тод болгоно. Иргэд нүүрсний хулгайчдад 15 жилийн хорих ял оноож, хөрөнгийг нь улсын өмч болгохыг шаардсан. Гэвч ял өгөх, бусдын хөрөнгийг хураах асуудал зөвхөн шүүхийн мэдэлд байдаг. Тэгэхээр мөрдөн шалгах ажиллагааг жагсагчдын шаардлагын дагуу эрчимжүүлж байгаа. ЦЕГ, АТГ-ын 40 орчим мөрдөн шалгах үүрэгтэй мөрдөгчид Өмнөговь аймгийн Цогтцэций суманд ажиллаж байгаа. Мөрдөн шалгах ажиллагаа явуулахдаа ажилчдын ажлыг цалгардуулахгүйгээр боломжтой цаг үед нь  мэдүүлэг авах ёстой. Хоёрдугаарт, "Эрдэнэс таван толгой" болон жижиг Тавантолгойн  олборлолт хийсэн талбай дээр шинжээчид хэмжилт хийж байгаа. Мөн гаалийн мэдээллүүдийг хилийн мэдээллүүдтэй тулгаж, хяналт шалгалт хийж байгаа. Мөн АТГ, ЦЕГ-ын албан хаагчид Таван толгойтой гэрээнүүдэд хяналт, шалгалт хийж, худалдан авалтын явцад бусдад давуу байдал олгосон эсэхийг шалгаж байгаа. Өнөөдрийн Засгийн газрын хуралдаанаар ГЕГ-ын даргаар томилогдож буй Р.Отгонжаргалд ГЕГ-ын үйл ажиллагааг ил тод болгохыг даалгасан” гэлээ.