Нийслэлийн цэцэрлэгийн насны хүүхдийн бүртгэлтэй холбоотой асуудлаар Боловсрорл шинжлэх ухааны яамны Бага, дунд боловсролын газрын дарга Т.Ням-Очир мэдээлэл хийлээ. Тэрбээр “Энэ жил хүсэлт хүлээн авах ажлыг анх удаа цахимаар зохион байгуулж байгаатай холбогдуулан системийн алдаа гарсан. Тухайлбал, нэг айлын 2-3 хүүхэд өөр өөр цэцэрлэгт хуваарилагдсан 4992 хүүхэд байна. Үүнийг харьяа цэцэрлэг дээр баталгаажуулж, нэг цэцэрлэгт хамруулах ажил зохион байгуулж байна. Цэцэрлэгийн насны 150 мянган хүүхдийн судалгаа байна. Бид энэ бүх хүүхдийг цэцэрлэгт хамруулахаар тодорхой ажлуудыг хангаж ажилласан. Хүсэлт ирүүлсэн 115 мянган хүүхэд байна. Тодорхой хаяггүй, байрны бүртгэлгүй иргэдийн хүүхдүүдийг харьяа газарт нь бүртгэхэд асуудалтай байна. Эцэг эхчүүд оршин суух хаягаа өөрчилж байгаа нь маш их хүндрэл учруулж байна. Хуурамч бүртгэл хийлгэж, ачаалал үүсгэж байгаа иргэд хаягийн дагуу очхоор хаалгаа тайлдаггүй, гэртээ байдаггүй гэх мэт шалтгаануудаас болж тодорхой зохицуулалт хийх шаардлагатай болсон. Ийм иргэдийг цагдаагийн байгууллагаар шалгуулна.  Мөн байршил нь хол хуваарилагдсан, дүүрэг нь андуурагдсан тохиолдолд дүүргийн боловсролын хэлтсээр дамжуулан залруулга хийгдэж байна. Өнөөдрийн байдлаар систем дээр гарсан алдааг 80-аас дээш хувьтай зохицуулсан байна. Үлдсэн өндөр ачаалалтай хороонуудыг иргэд болон хорооны удирдлагууд, төрийн өмчийн цэцэрлэгүүдтэй хамтран түрээсийн байруудыг буюу салбар цэцэрлэгүүдийг байгуулна. Дүүргийн боловсролын хэлтэстэй хамтран хувийн цэцэрлэгүүдээс хамрагдсан тойргийн хүүхдүүдийг авах уу гэх судалгааг авна. Түр оршин суугчдын хүүхдүүдийг суудал боломжтой газрууд дээр хоёр дахь бүртгэлийг явуулж шийднэ. Бидний зүгээс 140 мянган суудлын болгомжийг бий болгосон. Хамгийн гол хүндрэл бол хуурамч бүртгэл хийлгэсэн иргэдээс болж систем дээр алдаа гарч байна. Бид үүн дээр хяналт, шалгалт тогтмол хийж байгаа. Алслагдсан хороо дүүргийн хүүхдүүдийг ямар ч үнэ төлбөргүйгээр төрийн өмчит цэцэлэгт сургах шийдвэрий гаргасан. Хувийн цэцэрлэгүүд дээр хувьсах зардал нэмж олгож байна. Ачаалал өндөртэй байршлууд дээрх хамран сурах тойргийн хүүхэд сургаж байгаа бүх цэцэрлэгүүдийг шинэ, хуучин гэж ялгахгүй. Хувийн цэцэрлэгүүд дээр ч мөн энэ ялгааг гаргахгүй" гэв.