Нийслэлийн прокурорын газраас ирүүлсэн яллагдагч Б.Баасанцогтын  цагдан  хорих  хугацааг нэг сарын хугацаагаар  сунгуулах  тухай  саналыг  Хан-Уул дүүргийн Эрүүгийн хэргийн анхан шатны шүүх 2022 оны тавдугаар сарын 2-ны өдөр  хүлээн авч, Нийслэлийн прокурор болон яллагдагчийн өмгөөлөгч П.Одонтунгалаг, Г.Болдбаяр, Т.Батдорж  нарыг оролцуулан хянан хэлэлцсэн байна.

              Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.4 дэх  заалтад заасан “Урьд авсан таслан сэргийлэх арга хэмжээг зөрчсөн”, мөн 14.10 дугаар зүйлийн 2 дахь хэсэгт заасан  “Яллагдагчийн хувийн байдлыг харгалзан шаардлагатай бол цагдан хорих таслан сэргийлэх арга хэмжээний хугацааг  тухай бүр нэг сар хүртэл хугацаагаар сунгана” гэсэн хуулийн заалтуудыг  үндэслэн  цагдан хорих  нэгдүгээр   хугацааг  нэг сарын  хугацаагаар буюу  2022 оны тавдугаар сарын 7-ны өдрөөс 2022 оны зургадугаар сарын 07-ны өдрийг хүртэл  сунгаж  шийдвэрлэлээ. Урьд нь шүүхээс түүнийг энэ үндэслэлээр 2022 оны дөрөвдүгээр сарын 7-ны өдрөөс тавдугаар сарын07-ны өдрийг хүртэл яллагдагчаар цагдан хориод байв.

Яллагдагч  Б.Баасанцогтод Эрүүгийн хуулийн тусгай  ангийн 12.6 дугаар зүйлийн 2 дахь хэсэг / Биеэ үнэлэхийг зохион байгуулах/  мөн хуулийн  22.5 дугаар зүйлийн 1 дэх хэсэг /Хахууль өгөх/  заасан зүйл ангиудаар  эрүүгийн хэрэг үүсгэж, яллагдагчаар татан прокурорын шатанд хэргийг хянаж байна.

Эх сурвалж: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн тамгын газар