“Бээжин-2022” өвлийн олимпын наадамд ОХУ-ын Олимпын хороог төлөөлөн оролцсон уран гулгагч Камила Валиевагийн допингийн шинжилгээний хариу эерэг гарсан талаар бид өмнө нь мэдээлсэн. Гэсэн Спортын арбитрын шүүхийн зөвлөлөөс “Тамирчны допингийн эсрэг шинжилгээний хариуг цаг тухайд нь мэдэгдээгүй нь ноцтой асуудал болсон. Бээжингийн өвлийн олимпын үеэр энэ асуудал дэгдсэн нь тамирчны буруу биш” гэж хэмээн мэдэгдэж, өвлийн олимпын наадмын дараа Камила Валиеватай холбоотой асуудлыг шийдэх учир өчигдөр болсон уран гулгалтын эмэгтэйчүүдийн ганцаарчилсан төрөлд оролцохыг нь зөвшөөрсөн.

Сүүлийн өдрүүдэд сэргээштэй холбоотой асуудлаар шүүмжлэлд өртөөд байгаа Камила Валиева өчигдрийн уран гулгалтын эмэгтэйчүүдийн ганцаарчилсан төрөлд оролцож, эхний гурвалсан үсрэлтдээ бүдэрч, алдаа гаргасан ч, нийт 82.16 оноогоор бүх тамирчныг тэргүүлсэн юм.

            Тэгвэл Спортын арбитрын шүүхээс өөр нэгэн мэдэгдэл гаргасан нь ОХУ-ын Олимпын хорооны тамирчин Камила Валиевагийн допингийн шинжилгээнээс гурван өөр төрлийн бодис илэрсэн аж. Камила Валиевагийн сэргээшийн шинжилгээнээс илэрсэн гурван бодисын хоёр нь болох гипоксен, л-карнитиныг хориглодоггүй. Харин мөн Камила Валиевагийн шинжилгээнээс илэрсэн зүрх, судасны өвчинд хэрэглэдэг триметазидин эмийг 2014 онд Дэлхийн допингийн эсрэг агентлагаас хориглосон байдаг. Үүсээд байгаа нөхцөл байдалтай холбоотойгоор уран гулгагч Камила Валиева “Өвөөгийнхөө зүрхний эмийг санамсаргүй байдлаар уусан байж магадгүй” гэж мэдүүлжээ.