Шатахууны үнийн огцом өсөлтийг эсэргүүцсэн иргэд Казахстан Улсад төрийн тэргүүдээ огцрохыг шаардаж жагсаж байгаа. Үүнтэй холбоотойгоор Казахстаны Засгийн газар бүрэн бүрэлдэхүүнээрээ огцорч, 14 хоногийн хугацаатай онц байдал зарласан.

Тэгвэл хамгийн сүүлийн мэдээллээр Казахстан Улс даяар интернэт сүлжээ тасарчээ. Мөн албаныхны мэдээлснээр эсэргүүцлийн жагсаалын үеэр аюулгүйн хүчнийхэн амиа алдсан байна.

Казахстан Улсад интернэт тасрахаас өмнө жагсагчид Алматы хотын Захирагчийн газар, цагдаагийн автомашиныг шатааж байгаа талаар харуулсан бичлэг цахим сүлжээнд цацагдсан юм. Үүсээд байгаа нөхцөл байдалтай холбоотойгоор Казахстан Улсын Ерөнхийлөгч Касым-Жомарт Токаев “Төрийн тэргүүний хувьд энэ асуудлын эсрэг хатуу арга хэмжээ авахаар төлөвлөсөн. Энэ бол Казахстан Улсын аюулгүй байдлын түвшний асуудал. Ард түмэн намайг дэмжинэ гэдэгт итгэлтэй байна” хэмээн мэдэгджээ.