Уур амьсгалын өөрчлөлт бүс нутгуудад нөлөөлж, ойрын 30 жилийн хугацаанд Зүүн Африкийн олон сая хүн гэрээ орхиж, дүрвэх нөхцөл бүрдсэн талаар Дэлхийн банк НҮБ-ын СОР26 уулзалтын өмнө гаргасан тайландаа дурджээ.

Зүүн Африкийн Кени, Руанда, Танзани, Уганда, Бурунди зэрэг орон сүүлчийн жилүүдэд цаг агаарын эрс тэс үзэгдэл, гамшиг өртөх нь ихэссэн. Газар тариалангийн бүс нутаг бүхий Зүүн Африкт 2019 онд царцааны дайралт болж, олон сая тариалангийн бүсийг сүйтгэж, 2020 онд гамшгийн хэмжээний үер болж, энэ онд ган болсон нь хэдийнэ Зүүн Африк даяар гамшгийн аюул нүүрлэжээ.

          Энэ талаар Дэлхийн банкны бүс нутаг хариуцсан дэд ерөнхийлөгч Хафез Ганем “Өргөн хэмжээг хамарсан яаралтай арга хэмжээ авахгүй л бол 2050 он гэхэд уур амьсгалын өөрчлөлтийн улмаас 38.5 сая хүн Зүүн Африкаас дүрвэж болзошгүй” хэмээсэн байна. Хэрэв уур амьсгалын өөрчлөлтийн эсрэг үр дүнтэй арга хэмжээ авч чадахгүй бол ойрын 30 жилд дээр дурдсан тооны иргэдийг Зүүн Африкаас нүүлгэн шилжүүлэх ёстой талаар Дэлхийн банкны тайланд дурджээ.