АНУ-ын Хар тамхитай тэмцэх албанаас олон жилийн турш эрэн сурвалжилж, толгойд нь таван сая ам.долларын шан амлаад байсан Колумбын зартай хар тамхины бүлгийн толгойлогчийг өнгөрсөн амралтын өдөр тусгай ажиллагаа явуулж баривчилжээ.

          Колумбын хамгийн том “The Gulf Cartel” нэртэй гэмт бүлэглэлийн толгойлогч “Отонел” хочит Дарио Антонио Усуга Панамтай хил залгадаг Колумын баруун хойд мужийн ширэнгэд хэд хэдэн нуувч солин нуугдаж, өнгөрсөн жилүүдэд интернэтээс зайлсхийж зөвхөн шуудан зөөгчөөр туслахуудтайгаа харьцаж байсан аж. Тусгай ажиллагаанд Колумб Улсын тусгай салаанаас гадна АНУ, Их Британийн тагнуул хамтарч, 500 цэрэг, 22 нисдэг тэрэг дайчилсан байна. Харин зартай гэмт хэрэгтэнг барих ажиллагааны үеэр нэг алба хаагч амиа алджээ.

“Отонел” хочит зартай гэмт хэрэгтэн Дарио Антонио Усуга нь Колумбын Хувьсгалт цэргийн хүчин, Марксис-Леннинист босогчдын бүлэг, Колумбын Өөрийгөө хамгаалах зэвсэгт хүчинд харьяалагдаж, 2005 онд “The Gulf Cartel” бүлэглэлийг үүсгэн байгуулагч Дон Мариогийн дор оржээ. Дон Мариог амиа алдсаны дараа “Отонел” “The Gulf Cartel” бүлэглэлийг толгойлсон байна. “The Gulf Cartel” бүлэглэл бүрэн зэвсэглэсэн 1800 гаруй гишүүнээс бүрдэх бөгөөд хууль бус наймаагаа тив дамнуулан хийдэг гэнэ.

          АНУ-ын Хар тамхитай тэмцэх албанаас Дарио Антонио Усугаг 2003-2014 онд АНУ руу 73 тонн кокайн хууль бусаар нэвтрүүлсэн гэж үзсэн бөгөөд 2009 онд АНУ-ын шүүхээс хууль бусаар кокайн тээвэрлэж, наймаалсан, цагдаагийн алба хаагчийн амийг хөнөөсөн, хүүхдийн хөдөлмөрийг мөлжсөн зэрэг хэргээр ял оноож байжээ. Хагмийн сүүлчийн мэдээллээр “Отонел” хочит Дарио Антонио Усугаг Колумбаас АНУ руу шилжүүлэхээр бэлдэж байгаа юм.

Эх сурвалж: BBC, CNN