Дэлхийн Эрүүл Мэндийн Байгууллагаас зогсонги байдалд орсон “Ковид-19” вирусийн гарал үүслийн талаарх судалгааг сэргээж, үргэлжлүүлэх эрдэмтдийн шинэ баг бүрдүүлжээ. Ингэхдээ ДЭМБ-ын Онцгой байдлын хэлтсийн дарга Майкл Райан “Эрдэмтдийн шинэ баг коронавирусийн гарал үүслийн талаар мэдэх хамгийн сүүлчийн боломж ч байж болзошгүй”-г онцолсон байна.

          Коронавирусийн гарал үүслийг судлах ДЭМБ-ын эрдэмтдийн шинэ багт 700 гаруй мэргэжлийн салбараас сонгон шалгаруулж, 26 эрдэмтнийг нэр дэвшүүлсэн аж. Үүнд Берлиний Вирус судлалын хүрээлэнгийн дарга Кристиан Дростен, Бээжингийн Геномикийн хүрээлэнгийн эрдэмтэн Юнгуй Ян, Францын Пастер институтийн эрдэмтэн Жан Клод Манугерра, АНУ-ын Халдварт өвчнийг хянах, урьдчилан сэргийлэх төвийн эрдэмтэн Ингер Дамон нар багтжээ. Мөн “Ковид-19”-ийн гарал үүслийг тандаж байгаа ДЭМБ-БНХАУ-ын хамтарсан шинжлэх ухааны нийгэмлэгээс Владимир Дедков, Фараг Элмухашер, Теа Фишер, Марион Коопманс, Хунг Нгуен, Жон Уотсон нар багтсан байгаа юм.

ДЭМБ-ын эрдэмтдийн шинэ баг 14 хоногийн олон нийтийн хэлэлцүүлэгт хамрагдсаны дараагаар БНХАУ-ын Ухань хотыг зорино. Үүнтэй холбоотойгоор БНХАУ-аас НҮБ-д суугаа Элчин сайд Чэн Шү “Коронавирусийн цар тахлын гарал үүслийн судалгааг улстөржүүлэх ёсгүй”-г анхааруулсан байна.