Исламын Бүгд Найрамдах Афганистан Улсын нийслэл Кабул хотын олон улсын нисэх онгоцны буудалд өчигдөр буюу наймдугаар сарын 26-нд хоёр удаа дэлбэрэлт болжээ. Дэлбэрэлтийн улмаас Хамид Карзай нисэх онгоцны буудалд байсан 60 хүн амиа алдаж, 140 гаруй хүн шархадсан байна. Амиа алдагсдын дунд АНУ-ын тэнгисийн цэргийн алба хаагч, хүүхдүүд багтсан аж. Гэрчүүдийн мэдээлснээр дэлбэрэлт болох үед нисэх онгоцны буудалд ойролцоогоор 400-500 хүн байсан бөгөөд цаашид амиа алдсан, шархадсан хүний тоо илүү  нэмэгдэх гэнэ.

          Дэлбэрэлт болохоос өмнө олон улсын хэвлэлүүдээр Хамид Карзай нисэх буудалд террорист халдлага болж болзошгүйг анхааруулж, зарим орон Афганистанд оршин сууж байгаа иргэддээ гэрээсээ гарахгүй байхыг зөвлөж байсан. Хамид Карзай нисэх онгоцны буудалд болсон дэлбэрэлтийг Афганистан дахь Исламын улс бүлэглэл үйлдсэн талаар Талибан хөдөлгөөний төлөөлөгч Забихулла Мужахид мэдээлсэн юм.

Эх сурвалж: BBC