Афганистан Улсын нийслэл Кабул хотод орших тус улсын Батлан хамгаалахын сайд Бисмиллах Хан Мохаммадигийн гэрт зэвсэгт мөргөлдөөн болж, дөрвөн хүн амиа алджээ. Тодруулбал, өчигдөр буюу наймдугаар сарын 3-ны шөнө зэвсэгт этгээдүүд Батлан хамгаалахын сайд Бисмиллах Хан Мохаммадигийн гэрийн гадна тэсрэх бөмбөг дэлбэлж, гал нээсэн байна. Зэвсэгт мөргөлдөөний үеэр Батлан хамгаалахын сайд Бисмиллах Хан Мохаммади гэртээ байгаагүй бөгөөд түүний хамгаалалтын албаныхан гэр бүлийнхнийг нь аюулгүй газар руу шилжүүлж, хариу гал нээж, дөрвөн халдагчийг хөнөөсөн байна.

Зэвсэгт мөргөлдөөний үеэр шархадсан 11 хүнийг Афганистаны нийслэл Кабул дахь Итали Улсын яаралтай тусламжийн буяны байгууллагад шилжүүлж, эмчлүүлж байгаа гэнэ. Афганистаны ногоон бүсэд тэсрэх бөмбөг дэлбэлж, гэрт нь мөргөлдөөн болсон талаар Афганистан Улсын Батлан хамгаалахын сайд Бисмиллах Хан Мохаммади “Санаа зоволтгүй. Бүх зүйл зүгээр байна” гэж олон нийтэд мэдэгджээ.

Уг хэргийг АНУ-ын Төрийн департаментаас “Афганистан Улсын Батлан хамгаалахын сайдын гэрт болсон зэвсэгт мөргөлдөөн Талибаны халдлага гэх бүх үндэслэлийг агуулж байна” гэжээ. Харин Афганистан Улсад болж байгаа иргэний дайн, Талибан бүлэглэлийн эзлэн түрэмгийллийг хэлэлцээ байгуулах журмаар зогсоохыг НҮБ-ын Аюулгүй зөвлөлөөс шаардсан байна.

Эх сурвалж: BBC