Сураггүй болсон Украин Улс дахь Беларусийн цагаачдын байгууллагын тэргүүн Виталий Шишовын цогцсыг Киев хотын цэцэрлэгт хүрээлэнгээс олжээ.

Тодруулбал, өнгөрсөн даваа гарагт Беларусийн цагаачдын байгууллагын тэргүүн 26 настай Виталий Шишов гэрээсээ гүйхээр гараад сураггүй болсон талаар хамтрагчид нь цагдаагийн газарт мэдээлжээ. Холбогдох байгууллагад мэдэгдсэнээс нэг хоногийн дараа түүний цогцсыг Киев хотын цэцэрлэгт хүрээлэнгээс олсон аж.  Цогцсыг анх харахад нүүр нь  шархдаж, хамар нь хугарч, өвдөг хэсэгтээ шалбарсан байсан тухай түүний хамтран ажиллагч Олег Овчинников мэдээлсэн байна. Харин энэ талаар Украины Үндэсний цагдаагийн газрын дарга Игор Клименко “Гаднын халдлагад өртсөн эсэхийг нь тогтооход эрт байна” гэх албан мэдээ хүргүүлжээ. Игор Клименко уг хэргийг амиа егүүтгэсэн байж болзошгүй гэж үзэж байгаа гэнэ. Харин албан бус эх сурвалжийн мэдээлснээр “Виталий Шишовыг гүйхээр гарахад нь үл таних хүмүүс дагаж байсан” тухай мэдээлэл Беларусийн цагаачдын байгууллагад очсон аж.

Талийгаач Беларусийн цагаачдын тэргүүн асан Виталий Шишов Беларусь Улсын захирагч Александр Лукашенкогийн дэглэмээс зугтаж, Украин Улс руу дүрвээд байжээ. Тэрээр амиа алдахаасаа өмнө хамтрагчиддаа “Намайг энд ирснээс хойш үл таних этгээдүүд цаг үргэлж дагаж, мөшгөж байна” гэж байсан аж.

Үүнтэй холбоотойгоор НҮБ-ын Хүний эрхийн салбар хороо Украины Засгийн газарт Беларусийн цагаачдын байгууллагын тэргүүн Виталий Шишовын амийг хөнөөсөн хэргийг мөрдөн шалгаж, буруутай этгээдийг олж тогтоохыг уриалсан байна.

Эх сурвалж: Reuters