Хууль зүй, дотоод хэргийн сайд Х.Нямбаатар хоёрдугаар сарын 24-нд Засгийн газрын хуралдааны шийдвэрийг танилцуулах үедээ нэгэн ноцтой мэдээлэл өгсөн байдаг.

        Тэрбээр “Гадаадын хөрөнгө оруулагчийг зодож, дарамталсан хэрэг 2021 онд гарсан. Одоогоор хэргийг прокурорт шалгагдаж байгаа бөгөөд шүүхэд шилжүүлэх шатандаа явж байгаа. Гадаадын хөрөнгө оруулагч, концесс эзэмшигч иргэний машинд Улаанбаатар хотын төвөөс хоёр хүн сууж, хотын зах руу гарч байгаад эрх чөлөөнд нь халдаж, зодож, улмаар концесс эзэмших эрхээсээ татгалзахыг шаардаж, гарын үсэг зуруулсан. Түүнийгээ Төрийн ордны шуудангаар концесстой холбоотой байгууллага руу явуулсан. Өөрөөр хэлбэл, замын концесс эзэмшдэг компанийг концессоосоо татгалзахыг сүрдүүлсэн гэсэн үг. Үүнд гадаадын иргэд бас давхар холбогдож, шалгагдаж байгаа. Гадаадын хөрөнгө оруулагчдын эрхэд халддаг, айлган сүрдүүлдэг, Монгол Улсад оруулж ирэхийг хориглодог байдал сүүлийн 10 жилийн хугацаанд хэрээс хэтэрсэн. Уг байдлыг таслан зогсоох ёстой” гэсэн юм.

                Тэгвэл гадаадын иргэнийг дарамталж, "Концессын гэрээнээсээ татгалз" хэмээн сүрдүүлсэн хэрэг Шадар сайд С.Амарсайхантай холбогдох бололтой. Албаны эх сурвалжаас авсан мэдээллээр “Уг хэргийг хууль хяналтын байгууллага шалгаж байгаа. Гадаадын хөрөнгө оруулагчийг дарамталж, сүрдүүлж, дарамталж, гарын үсэг зуруулаад, Төрийн ордны шуудангаар концесстой холбоотой байгууллага руу илгээсэн байдаг.  Сонирхолтой нь, энэ хэрэг Шадар сайд С.Амарсайхантай холбоотой байж болзошгүй. Уг гэрээг хүлээж авсан хүн нь С.Амарсайхан гэх мэдээлэл байна” гэлээ.