Эрүүл мэндийн яамнаас цаг үеийн асуудлаар мэдээлэл хийж байна. Нэгдүгээр сарын 8-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, авто лаборатори, НЭМҮТ-ийн лаборатори, Дархан-Уул, Сэлэнгэ, Дорнод аймгийн салбар лабораторид  13773 хүнд PCR шинжилгээ хийхэд 13 хүнээс коронавирусийн халдвар илэрсэн байна.

Энэ талаар ХӨСҮТ-ийн Тандалт, судалгааны албаны дарга А.Амбасэлмаа "Улаанбаатар хотод 13 тохиолдол илэрлээ. Энэ нь өмнө нь тусгаарлагдсан хүмүүсийн ойрын хавьтал байна. Тухайлбал, "Ачтан-Элит клиник" эмнэлэг, "Тэнүүн-Огоо" компанийн ажилтны ойрын хавьтал, Баянзүрх дүүргийн нэгдсэн эмнэлгийн хавьтлууд байгаа юм. Тусгаарлан ажиглаж байсан хүмүүсээс ихэвчлэн илэрсэн. Ингэснээр Улаанбаатар хотын голомт 584 боллоо. Бусад аймагт нэмж халдвар илрээгүй.  Улсын хэмжээнд класстер өвчлөл 910 бол нийт тохиолдол  1408 болоод байна" гэв.