Дэлхийн алдартай контент бүтээгчдийн нэг “Nas Daily”-гийн үүсгэн байгуулагч Нусейр Ясин контент бүтээгчдийн “Nas Summit” арга хэмжээг зохион байгуулахаар Монгол Улсад ирээд байгаа. Үүнтэй холбоотойгоор “Nas Summit” арга хэмжээнд оролцох олон алдартай контент бүтээгч ирж байгаагаас онцлох нэг нь “Tik Tok” сүлжээнд алдарсан илбэчин Жулиус Дейн. Тэгвэл уншигч танд 70 сая дагагчтай дэлхийн хамгийн алдартай илбэчдийн нэг Жулиус Дейн гэж хэн болохыг танилцуулж байна.

-ИЛБЭЧИН ЖУЛИУС ДЕЙН ГЭЖ ХЭН БЭ-

Их Британийн илбэчин Жулиус Дейн “Tik Tok” цахим сүлжээний хамгийн нөлөө бүхий хүмүүсийн нэг. Өдгөө 27 настай илбэчин хөзрийн илбэ, “Tik Tok” хуудастаа байршуулдаг өвөрмөц илбээрээ алдаршсан бөгөөд түүний “Facebook” хаяг дангаараа 43 сая гаруй дагагчтай юм байна.

                             Жулиус Дейнийг есөн настайд өвөө, эмээ нь циркийн илбийн үзүүлбэр үзүүлсэн нь хожим түүнийг илбэд дурлуулж, амьдралаа хөөх замыг нь тавьжээ. Улмаар Жулиус анх үзсэн илбийн үзүүлбэрээсээ л эхлэн даган дуурайж, илбийн үзүүлбэр турших болсон байна.

Илбэчин Жулиус Дейн АНУ-ын Лос-Анжелес хотын UCLA их сургуулийг маркетингийн чиглэлээр төгсжээ. Жулиус их сургуулиа төгссөний дараа цахим сүлжээ, тэр дундаа “Tik Tok” сүлжээнд идэвхтэй контент оруулж эхэлсэн нь өнөөгийн олон сая цахим сүлжээ хэрэглэгчийн мэддэг “Шидтэн Жулиус”-ийн эхлэл болжээ. Түүний илбийн үзүүлбэр зөвхөн цахим сүлжээгээр тогтоогүй бөгөөд Жулиус дэлхийн 50 гаруй орноос аялж, илбийн үзүүлбэрийн тоглолт хийж байсан юм байна. Мөн түүнийг “Forbes” ,“Good Morning Britain”, “Steve Harvey Show”, “Business Insider” зэрэг алдартай сэтгүүлч онцолж байжээ.

Сонирхуулахад, Жулиус Дейний “Tik Tok” хаяг 11.9 сая, “Youtube” хуудас 8.9 сая, “Instragram” хаяг 6.7 сая, “Facebook” хуудас 43 сая дагагчтай бөгөөд барууны санхүүгийн сэтгүүлүүд түүнийг таван сая ам.долларын хөрөнгөтэй гэж үздэг.