АТГ-аас МАН-ын дарга асан М.Энхболдод холбогдох 60 тэрбум төгрөгийн хэргийг дахин шалгахаар болжээ. Тодруулбал, хамтарсан ажлын хэсгээс хэргийг дахин шалгах шаардлагатай гэж үзэн прокурорт хандсанаар Нийслэлийн прокурорын газраас эл шийдвэр гаргасан гэнэ. Ингэснээр эл хэргийг гурав дахь удаагаа сэргээж,  шалгахаар болж байгаа бололтой.

Хэргийг эргэн сануулбал, 2016 оны УИХ-ын сонгуулиар М.Энхболд, Ц.Сандуй нарын 60 тэрбумын талаарх ярианы бичлэг цацагдсан нь 2017 оны Монгол Улсын Ерөнхийлөгчийн сонгуулийн үер шуугиан тарьсан юм. 60 тэрбум төгрөг босгож, төрийн эрх мэдлийг хууль бусаар авах, хуйвалдаан зохион байгуулсан хэрэгт яллах дүгнэлт үйлдэж, Баянгол дүүргийн Эрүүгийн анхан шатны шүүхэд шилжүүлсэн байдаг. МАН-ын удирдах албан тушаалтнууд төрийн албан тушаалыг худалдаж, 60 тэрбум төгрөг босгохыг завдсан гэх хэрэг хэдэн он дамжин яригдаж байгаа. Өнгөрсөн онд л гэхэд АТГ, ЦЕГ, тагнуулын байгууллагынхан шинээр илэрсэн нөхцөл байдлын улмаас 60 тэрбумын хэргийг сэргээн шалгаж эхэлсэн байдаг. Тэгвэл эрх баригч намын удирдлагуудын төрийн албыг наймаалцсан гэх 60 тэрбумын хэргийг дахин сэргээсэн нь энэ.

60 ТЭРБУМЫН ХЭРГЭЭР ЯЛ СОНССОН Ц.САНДУЙ, А.ГАНБААТАР НАРЫН ХОРИГДОХ ХУГАЦАА ДУУСЧЭЭ

      Ташрамд дурдахад, бичлэгт оролцсон зарим нэр бүхий хүнд эрүүгийн хэрэг үүсгэж, яллах дүгнэлт үйлдсэн юм. Тодруулбал, НИТХ-ын дарга асан Ц.Сандуй, А.Ганбаатар нарт Нийслэлийн прокурорын газраас 2002 оны Эрүүгийн хуулийн тусгай ангийн 82 дугаар зүйлийн 82.1 дэх хэсэгт зааснаар “Төрийн эрх мэдлийг хууль бусаар авах хуйвалдаан зохион байгуулах” гэмт хэрэгт яллах дүгнэлт үйлдсэн юм. Тэдэнд холбогдох шүүх хурал 2019 онд болж, Баянгол дүүргийн эрүүгийн хэргийн анхан шатны шүүхээс А.Ганбаатар, Ц.Сандуй нарт дөрвөн жилийн хорих ял оноосон байдаг. Угтаа тэдний хоригдох хугацаа дуусгавар болжээ.  

60 ТЭРБУМЫН ХЭРЭГТ М.ЭНХБОЛДЫГ НАРИЙВЧЛАН ШАЛГАХ БОЛОЛТОЙ

Тэгвэл энэ удаад МАН-ын дарга асан М.Энхболдыг нарийвчлан шалгах бололтой. Учир нь, уг хэргээс М.Энхболдод холбогдох хэсгийг тусгаарлаж, дээрх хоёр хүнд ял оноосон байсан юм.

Хачирхалтай нь, М.Энхболдыг 60 тэрбумын хэрэгт шалгаж байгаа талаарх мэдээлэл үе үе цацагддаг ч хэрхсэн нь тодорхой билээ. Тухайлбал, өнгөрсөэ 2020 онд Тагнуулын ерөнхий газраас М.Энхболдод холбогдох хэргийг сэргээн шалгаж байгаа мэдээлэл гарсан. Харин М.Энхболд уг мэдээллийг үгүйсгэж байсан юм.

Тухайлбал, тэрбээр хэвлэлд өгсөн тодруулгадаа “60 тэрбумын гэгдэх асуудал бол ор үндэслэлгүй. Тухайн үед би байгаагүй. Энэ бол улстөрийн зорилготой зүйл болсон. Би одоо улс төрийн намын Удирдах зөвлөлийн гишүүнээр ажиллаж байгаа” гэж байжээ

            Тэгвэл энэ удаад М.Энхболдод холбогдох хэргийг жинхнээсээ шалгах уу, үгүй юү гэдгийг харах л үлдлээ.

М.ЭНХБОЛД ГЭЖ ХЭН БЭ

М.Энхболд гэж хэн бэ гэдгийг танилцуулж байна. Тэрбээр 2017 онд Монгол Улсын Ерөнхийлөгчийн сонгуульд нэр дэвшсэн. МАН-аас намын дарга, УИХ-ын даргаар ажиллаж байсан. Мөн Монгол Улсын Ерөнхий сайд, Шадар сайд, УИХ-ын дэд дарга зэрэг төрийн өндөр албан тушаалыг хашиж байсан.