Баянзүрх дүүргийн гуравдугаар хороо, Бөхийн өргөөний уулзварт 44 настай эрэгтэй архи согтууруулах ундааны зүйл хэрэглэсэн үедээ тээврийн хэрэгсэл жолоодож, албан үүргээ гүйцэтгэж байсан алба хаагчийг мөргөж, биед нь гэмтэл учруулжээ.

Энэ талаар ТЦА-ны Урьдчилан сэргийлэх хэлтсийн дарга, цагдаагийн дэд хурандаа Б.Очирбат “Өчигдөр 17:30 цагийн орчимд “Приус-20” маркийн автомашины жолооч Б нь архи, согтууруулах ундааны зүйл хэрэглэсэн үедээ замын хөдөлгөөнд оролцож, зам тээврийн ноцтой осол гаргасан. Ослын улмаас албан үүргээ гүйцэтгэж байсан цагдаагийн алба хаагч гэмтсэн” гэлээ.

Харин осол гаргасан жолооч Б “Би Хоёрдугаар төв эмнэлэгт өвчтэй хүн сахиж байсан юм. Машиндаа жоохон уугаад, энүүхэн энэ уулзвар гарчихъя гэж бодсон минь буруу боллоо. Үүн дээр л буруутлаа" гэв.

Одоогоор тус хэргийг харьяаллын дагуу Баянзүрх дүүрэг дэх Замын цагдаагийн хэлтэст шалгаж байна.