Завхан аймгийн Нөмрөг сумын малчин Болдбаатарын хоттой хонь руу чоно дайрч, дөрвөн настай охин нь аюулд орсон талаар бид өмнө нь мэдээлсэн билээ. Тухайн үед юу болсон талаар бид өөрөөс нь тодрууллаа.

-Сайхан намаржиж байна уу, та?

        -Сайхан намаржиж байна. Удахгүй өвөлжөөндөө бууна даа. Хүүхдүүд маань хичээлдээ яваад, бид хөдөө гэртээ байгаа.

-Тухайн үед юу болсон талаар та яриад өгөхгүй юу?

         -Гэгээ орж байхад манай гэрийнхэн сэрсэн юм. Тэр өдөр овооны наадамтай байсан учраас бид эртлэн босож, бэлтгэлээ базааж эхэлсэн. Бага охин бид хоёр гэрээс гарч, хэдэн хонио эрт бэлчээрт гаргах гэж байлаа. Би морио эмээлж, охиноо хонины хажууд үлдээсэн. Манайх засмал замаас холгүйхэн зусаж байсан юм. Биднийг гэрийн гадаа байж байхад машинтай залуу айл асууж ирсэн. Төд удалгүй хонь үргэж, нохой хуцаад эхэлсэн. Манай нутаг чоно ихтэй учраас би мориныхоо цулбуурыг нөгөө залууд өгөөд, гэр рүүгээ гүйж ороод буугаа авч гарсан юм. Гэрийн гадаа зогсож байсан залуу морийг маань унаад охин руу дөхсөн юм билээ. Чоно харсан морь яаж тийшээ дөхөх билээ дээ. Би гэрээс гарч ирээд буудсан чинь алдаад буудчихсан. Нөгөө залуу бууг минь шүүрч аваад, чоныг буудаж охиныг минь аюулаас аварсан.

-Залуу явахдаа танд ямар нэгэн юм хэлсэн болов уу?

          -Нөгөө залуу “Танайд гарз, хохирол учраагүй юм чинь би чоноо аваад явлаа” гээд яваад өгсөн. Тухайн үедээ бид сандраад нэрийг нь асууж чадаагүй явуулсан. Дүүдээ энэ тухай хэлсэн чинь цахим сүлжээнд бичсэн байна лээ.

-Таны хайгаад байсан залуу А.Дөлгөөн гэдэг юм билээ. Та утсаар ярьсан уу?  

          -Тийм байна лээ. Зурагтаар ярьж байхыг нь сонссон. Утсаар ярьж, сэтгэлийн бэлэг илгээсэн байгаа. Нөгөө залуу маань энэ талаар дахиж ярихыг хүсэхгүй байгаа учраас тэгээд орхисон.

-Охиных нь сэтгэл санаа давгүй юу?

          -Охин маань сайн байгаа. Тухайн үедээ их айсан байна лээ. Охиныг минь аюулаас аварч, манай гэр бүлд аз жаргал бэлэглэсэн тэр залууд маш их баярлалаа гэж хэлмээр байна.