Өмнөговь аймгийн Баяндалай сумын Эрүүл мэндийн төвд эмчлүүлж байсан 51 настай, эмэгтэй А эмнэлгээсээ зугтаж, алга болжээ.

                Энэ талаар Баяндалай сумын Эрүүл мэндийн төвийн даргаас тодруулахад “Ковидын халдвараар өвчилж, эмчлүүлж байсан эмэгтэй тусгаарлалтын байрнаасаа гарч, алга болсон нь үнэн. Алга болсон эмэгтэй нь сэтгэцийн бага зэргийн өөрчлөлттэй юм. Тухайн эмэгтэй нь хөдөө малчин бөгөөд эмнэлэгт ирээд тав хонож байсан. Манай суманд ковидын халдвараар өвчилсөн иргэдийг гурван тусгаарлах байранд эмчилж байгаа. Тухайн үед ажиллаж байсан сувилагч нь гарахдаа гадна үүдээ түгжээгүй байсан. Үүнийг мэдээд гараад явсан байна лээ. Өрөөнийх нь хүмүүс алга болчихлоо гэж мэдэгдэж, бид эрлийн ажиллагааг эхлүүлсэн. Цагдаагийн байгууллагын алба хаагчидтай хамтран хөдөө гэр болон очиж болох бүх газраар нь хайсан. Гэтэл тухайн эмэгтэй нь айлын хашаанд орж, байшингийнх нь ард нуугдсан байна лээ. Тэгээд тухайн өдрийн орой нь төрсөн ахындаа очсон. Очсоныг нь мэдсэн даруйдаа эмнэлгийн багийнхан очиж авсан. Эмчилгээ нь дуусаж, гэртээ харьсан” гэв.