2017 онд Хэнтий аймгийн Батноров суманд "Андлалын өргөө" цогцолбор барихаар 1.9 тэрбум төгрөг төсөвлөж, ажил нь эхэлсэн ч зохиогчийн эрхийн маргаанаар барилгыг нураасан билээ. Тэгвэл "Андлалын өргөө"-ний суурин дээр "Тэнгэрийн андгай" шинэ цогцолборыг байгуулсан.

           Хоёр сарын дотор баригдсан “Тэнгэрийн андгай” цогцолборыг ард, иргэдийн хандиваар барьсан гэдгийг албаныхан мэдээлээд байгаа. Мөн тус бүтээн байгуулалтыг үзэж сонирхох гэсэн иргэдийн цуваа тасрахгүй байгаа ажээ.

    Энэ талаар Батноров сумын Засаг дарга Д.Жадамбаагаас тодруулахад “Одоогийн байдлаар бүтээн байгуулалтын ажил дуусаагүй байгаа учраас орон нутагт хүлээлгэж өгөөгүй байна. Хөшөөг үзэж, сонирхох иргэдийн цуваа тасрахгүй байна. Бид сумын хүнийг харуулаар авч, хөшөөг мануулж байгаа. Энэ хүний цалинг Хэнтийн аймгийн нутгийн зөвлөлөөс хариуцаж байгаа. Жуулчны бааз баригдаж, бүтээн байгуулалт бүрэн ашиглалтад орсны дараа хөтөч ажиллуулах болон дараа дараагийн авах хэмжээ яригдана. Одоогийн байдлаар өдөрт 10 гаруй машин хүн хөшөөг зорьж ирж байна” гэлээ.