Газрын тосны томоохон үйлдвэрлэгчдийн бүлэг болох ОПЕК-ийн хурал Монголын цагаар өнөөдөр буюу нэгдүгээр сарын 5-ны 09:00 цагт эхэлнэ.

 ОПЕК-ийн хурлаар ирэх хоёрдугаар сард дэлхийн газрын тосны олборлолтыг нэмэгдүүлэх асуудлаар хэлэлцэх юм.

-Газрын тосны олборлолтыг нэмэгдүүлэх сургаар үнийн өсөлт нь үргэлжлэв-

ОПЕК-ийн хурал эхлэхээс өмнө газрын тосны үнэ 2021 онд өссөн үзүүлэлтээ хадгалж, тогтвортой үргэлжлэв.

           24 цагийн дотор Брент газрын тосны үнэ 22 цент буюу 0.3 хувиар өсөж, нэг баррель нь 79.20 ам.доллар болсон бол, Баруун Техасын WTI төрлийн газрын тосны үнэ 21 цент буюу 0.3 хувиар өсөж, 76.29 ам.доллар болжээ.

           2021 оны наймдугаар сард ОПЕК-ийн холбоо болон холбооны гишүүн бус ОХУ зэрэг газрын тос үйлдвэрлэгч оронтой хамтарч, үйлдвэрлэлээ өдөрт 400 мянган баррелиар нэмсэн. Үүнтэй холбоотойгоор өнгөрсөн оны арваннэгдүгээр сар, арванхоёрдугаар сард газрын тосны үнэ дээд түвшинд хүрсэн.

           “Energy Aspects” компанийн шинжээч, эдийн засагч Вирендра Чаухан “Газрын тосны үнийн гол хөдөлгөгч нь ОПЕК. Үнэ нь өсөх үү, буурах уу гэдгийг холбоо шийддэг. ОПЕК-ийн холбоо зах зээл дэх нийлүүлэлтийг бүрэн удирдаж байгаа” талаар онцлон хэлсэн. Тэгвэл ОПЕК-оос олборлолтыг нэмэгдүүлж, үнийн өсөлтөд нөлөөлөх чиглэлээ өөрчлөх магадлал бага байгааг “RBC Capital Markets” шинжээчид анхааруулж байна.

-Хоёрдугаар сард газрын тосны олборлолтыг өдөрт 400 мянган баррелиар нэмэгдүүлнэ-

           ОПЕК-ийн холбоо өчигдөр “Хоёрдугаар сард газрын тосны олборлолтыг өдөрт 400 мянган баррелиар нэмэгдүүлэх чиглэл баримтлах” талаараа мэдэгдсэн. Тэгвэл ОПЕК-ийн ээлжит хурлаар дэлхийн газрын тосны олборлолтыг 400 мянган баррелиар нэмэгдүүлэх чиглэлээ барихыг дөрвөн эх сурвалж баталгаажуулж хэлжээ. Мөн хурлаар яригдах өөр нэгэн томоохон асуудал нь өмнөх хурлаар хэлэлцсэн үнийн чиглэлийг өөрчлөх асуудал байх аж.

-ОПЕК-ийн холбоо зах зээлээр дамжуулан хөгжиж буй болон хөгжингүй орнуудыг “базах” уу-

           ОПЕК-ийн холбооны өөр нэгэн анхаарах ёстой асуудал нь Украин, ОХУ, АНУ-ын асуудал байх гэнэ. ОХУ цэргүүдээ Украины хил дээр байршуулсан тухай асуудлаар АНУ, Европын холбоо ОХУ-д хориг арга хэмжээ авбал ОПЕК дахин чиглэлээ өөрчлөх шаардлагатай болох юм. Дэлхийн томоохон газрын тос олборлогчдын нэг болох ОХУ-ын асуудлаас гадна Ираны цөмийн зэвсгийн туршилттай холбоотой асуудал газрын тосны олборлолт, үнэд ч нөлөөлөх эрсдэлтэй байна.

           Өнгөрсөн 2021 онд Брент төрлийн газрын тосны үнэ 50 гаруй хувиар өссөн нь АНУ-д шатахууны үнийн өсөлтөд нөлөөлж, эрх баригчид тогтоож чадахааргүй болсон. Үүнтэй холбоотойгоор Жо Байдены Засаг захиргаа газрын тосны илүүдэл үүсэж байгаа орнуудад анхаарч, үнийн өсөлтийг бууруулахад анхаарч ажиллахыг ОПЕК-оос шаардсан.

           ОПЕК-ийн холбоо уулзалт болгоноороо олборлолтоо нэмэгдүүлэх зорилт тавьж байна. Гэвч олборлолтоо нэмэгдүүлэх зорилт нь бодит үйлдвэрлэлд хоцорч байгаа нь үнийн өсөлтөд ч нөлөөлж байгаа.

           Өнгөрсөн оны долдугаар сард болсон ОПЕК-ийн хурлаар оны төгсгөлд газрын тосны олборлолтыг нэмэгдүүлэх чиглэл тавин ажилласан. Тэгвэл ОПЕК-ийн 2021 оны аравдугаар сард газрын тосны гарцыг өдөрт 730 мянган баррелиар, арваннэгдүгээр сард өдөрт 650 мянган баррелиар нэмэгдүүлэх зорилтот түвшиндээ хүрч чадаагүйг Олон улсын эрчим хүчний агентлагаас мэдээлжээ.

           “Ройтерс” агентлагаас гаргасан техникийн тайландаа “ОПЕК эдийн засгийн хэтийн төлөвт хий хоосон өөдрөгөөр хандаж байгаа”-г онцолсон байна. Өөрөөр хэлбэл, цар тахлын үеэс хойш сэргэж чадаагүй эдийн засагт газрын тосны олборлолтыг нэмэгдүүлж байгаа нь эдийн засгийн тогтвортой байдлыг эвдэж, зах зээл дэх газрын тосны үнээр хөгжиж буй болон хөгжингүй орнуудыг “удирдаж” байгаа юм.