Гадаад харилцааны яамнаас өнөөдөр нутаг буцах хүсэлтэй иргэдээ татан авах, тийзний үнийг бууруулах асуудлаар мэдээлэл хийлээ. Энэ үеэр Гадаад харилцааны сайд Б.Батцэцэг иргэдээ татан авах ажлын хүрээнд тусгай үүргийн нислэгийн дөрөвдүгээр сарын төлөвлөгөө боловсруулж, агаарын хилийг цаашид шат дараатай нээх талаар хэлсэн. Энэ хүрээнд гуравдугаар сарын 1-ний татан авалтаас эхлэн бүх чиглэлийн тийзний үнийг 15 хувь бууруулахаар болжээ.

Өнөөдрийн байдлаар нутаг буцах хүсэлтээ илэрхийлсэн 9411 иргэн байна

Энэ талаар МИАТ компанийн Коммер эрхэлсэн захирал Я.Өлзийболд "Улсын онцгой комиссоос МИАТ компанид тийзийн хөнгөлөлтийн асуудлыг яаралтай шийдвэрлэж, бүх чиглэлийн тарифийг 15 хувиар бууруулах чиглэл өгсөн. Үүний дагуу тийзийн үнийн хөнгөлөлт гуравдугаар сарын 1-нээс эхлэн бүх татан авалтын нислэгт үйлчилнэ” гэлээ.

ЭНЭ ХҮРЭЭНД: 

• Сөүл чиглэлийн тусгай үүргийн нислэгийн тийзийн 530 мянган воны үнэтэй үндсэн тариф нь 457 мянган вон болж, 72 мянган вонноор
• Токио чиглэлийн тийзийн 59150 иений үндсэн тариф нь 51050 иен болж 8100 иенээр
• Франкфурт чиглэлийн тийз 830 евро байсан нь 731 евро болж 99 еврогоор
• Истанбул чиглэлийн тийз 734 ам.доллар байсан нь 629 ам.доллар болж, 102 ам.доллароор
• Нур-Султан чиглэлийн тийз 364 ам.доллар байсан нь 314 ам.доллар болж 50 ам.доллароор тус тус хямдрах юм байна.