Баянхонгор аймгийн Баянцагаан сумын Гичгэнэ багийн Бор даргавай гэдэг газар аймгийн төвөөс баруун урд зүгт 239 км, сумын төвөөс баруун хойд зүгт 55 км-т таван ханатай гэр өчигдөр 15:30 цагийн үед шатсан тухай мэдээллийг онцгой байдлын алба 15:46 цагт хүлээн авчээ.

Тус аймгийн Онцгой байдлын газрын Гал түймрийн улсын хяналтын байцаагчаар ахлуулсан алба хаагчид, Баянцагаан сум дахь Эрэн хайх, аврах бүлэг, аймгийн Цагдаагийн газрын алба хаагчид сумын Засаг даргын Тамгын газрын ажилтнууд гал түймрийн шалтгаан нөхцөлийг тогтоохоор ажиллаж байна. Малчин Т-ийн таван ханатай гэр шатаж, гал түймэрт А /долоон настай, эмэгтэй/, П /1.7 настай, эрэгтэй/ нар өртөж нас баржээ.