“Boom-Up Korea Week 2025” нь БНСУ-ын төрийн өмчит байгууллага болох KOTRA болон Худалдаа, аж үйлдвэр, эрчим хүчний яам (БНСУ) хамтран зохион байгуулдаг экспорт, олон улсын худалдааны томоохон арга хэмжээнүүдийн нэг юм. БНСУ-ын экспортын бүтээгдэхүүн үйлдвэрлэгч болон технологийн компаниудыг олон улсын худалдан авагчидтай холбох, шинэ зах зээлд нэвтрэх боломжийг олгох, нэмэгдүүлэх зорилгоор зохион байгуулагдсан “Boom-Up Korea Week 2025” үзэсгэлэн яармагт “Улаанбаатар хотын хөгжлийн корпораци” ХК-ийн төлөөлөл оролцож аж ахуйн нэгж байгууллагуудтай санал солилцлоо. Тус үзэсгэлэн яармаг нь 2 өдрийн турш зохион байгуулагдсан бөгөөд олон улсын зочид төлөөлөгч, бизнес эрхлэгчдээс гадна БНСУ-ын 700 гаруй ААН, байгууллага, компанийн төлөөлөл оролцлоо.

     “Улаанбаатар хотын хөгжлийн корпораци” ХК-ийн төлөөлөл БНСУ-ын 20 гаруй байгууллагатай уулзаж санал солилцсон бөгөөд төр хувийн хэвшлийн түншлэлийн хүрээнд хэрэгжүүлж буй төсөл хөтөлбөрүүдэд хамтран ажиллах боломж, мөн дэвшилтэд технологийн боломжуудыг судалсан юм. Тухайлбал, БСНУ-ын BYDA Sensor & System Co.,Ltd – нь AI ашиглан тээврийн аюулгүй байдлын mmWave radar технологийг нэвтрүүлдэг бөгөөд 200-350м зайд илрүүлэх чадвартай ухаалаг уулзвар, явган хүний гарц системийг хотын авто замын ачаалал, явган зорчигчийн аюулгүй байдал, зам тээврийн осол бууруулахад ашиглах боломжтой юм. 

     INFOCAR Mobility - Гар утасны апп, вэб системээр дамжуулан тээврийн хэрэгслийн дата флатформ, жолоодлогын аюулгүй байдлын мэдээллийг цуглуулах боломжтой ба хотын тээврийн дата анализ, ухаалаг жолоодлогын системийг ашиглан зам тээврийн ослыг бууруулах боломжтой ажээ. Dareesoft Inc нь 2020 онд байгуулагдсан бөгөөд “Технологи, замын аюулгүй байдал” гэсэн гол санааг даган, замын нөхцөл, аюул, сэрэмжлүүлэгтэй холбоотой программ хангамжийн үйлчилгээ үзүүлдэг бөгөөд компаний үндсэн бүтээгдэхүүн үйлчилгээнд RiaaS- (“Road Hazard Information as a Service”) Замын аюулын мэдээллийг үйлчилгээ болгон ашиглаж буй мэдээллийн платформ ордог байна.