Жүжигчин, дуу оруулагч О.Оюунд МУГЖ цол хүртээлээ. Тэрбээр “Бид аливаа уран бүтээлийн ард хамт олноороо хөдөлмөрлөж, мэдэрч, түүндээ авьяас, чадвараа зориулж байж ард нь гардаг. Өнгөрсөн хугацаанд би 2000 гаруй уран бүтээлд дуу оруулсан байна. Орчуулгын киноны уран бүтээлчид ур чадвар, авьяас, мэдрэмжээрээ бусдаас илүү байдаг юм шиг санагддаг. Тийм учраас орчуулгын киноны дуу оруулагч хэмээн хүндлэгдэж явдгаараа бахархдаг. Жүжигчний хувьд миний анхны уран бүтээл бол “Илүү сартай зун” киноны Ариунаагийн дүр байдаг. Орчуулгын киноны уран бүтээлчдыг ард түмэн энгийн үед ч кино үзэж байгаа юм шиг сайхан сонсогдож байна хэмээн ярьдаг. Дуу оруулагч, жүжигчдийн дуу хоолой хүмүүсийн зүрх сэтгэлд ямар сайхан хүрдэг юм бэ гэж боддог. Уран бүтээлч хүмүүс ард түмнээсээ магтаал, зэмлэлийг ил тод сонсож, мэдэрдэг учир МУГЖ цолоор шагнуулах болсон тухайгаа сонсоод тийм ч их сэтгэл хөдөлсөнгүй. Бидний хөдөлмөрийг үнэлж байна гэж бодлоо” гэв.