"Тавантолгой түлш" ХХК-д ажилладаг, 22 настай иргэн А үйлдвэрийн ослын улмаас өнөө өглөөний 06:22 цагт амиа алдсан талаар Монголын Эрчим хүч, геологи, уул уурхайн үйлдвэрчний эвлэлийн холбооноос мэдээллээ. Тус холбооны мэргэжилтнүүд "Энэ нь “Тавантолгой түлш” ХХК-д гарсан анхны осол биш. Өмнө нь хоёр удаа үйлдвэрийн осол гарч байсан бөгөөд зориулалтын хөдөлмөр хамгаалалтын хувцас хэрэгслээр хангаагүйгээс болсон. Харин энэ удаагийн осол барьцалдуулагч бодисыг нүүрстэй хольж, шахмал түлш үйлдвэрлэдэг холигч машиныг цэвэрлэж байхад цаана нь ажиллаж байсан ажилтан төхөөрөмж ажиллуулах товчлуур дарсны улмаас А-гийн амь эрсэджээ. "Тавантолгой түлш"-ийн хөдөлмөр, зохион байгуулалтын ажлыг Эрчим хүчний яам шалгах хэрэгтэй” хэмээн Монголын Эрчим хүч, геологи, уул уурхайн үйлдвэрчний эвлэлийн холбооноос үзэж байна.

Мөн үйлдвэрийн ослыг судлан бүртгэх дүрэм бий. Ажлаа хийж байх явцдаа амиа алдсан бол үйлдвэрийн осолд орсон гэж үздэг. Үйлдвэрийн ослыг нуун дарагдуулахыг хуулиар хориглодог. Цаашид "Тавантолгой түлш" ХХК үйлдвэр, хөдөлмөр зохион байгуулалтыг шийдэхгүй бол ахиж осол гарах эрсдэлтэй. Одоогийн байдлаар  Цагдаагийн ерөнхий газар, ОБЕГ, Эрчим хүчний яамнаас комисс томилогдон ажиллаж байгаа юм.