УОК-ын шуурхай штабаас ээлжит мэдээлэл хийлээ. Энэ үеэр УОК-ын шуурхай штабын дарга, хурандаа Б.Ууганбаяр “Улаанбаатар хотод 39 тусгаарлах байр байна. Тус байр нь гадаад орноос ирсэн иргэд болон Улаанбаатар хотын халдвартай иргэдийг тусгаарлах үндсэн хоёр чиглэлийн дагуу ажиллаж байгаа. Өнөөдрийн байдлаар Улаанбаатар хотод 22 тусгаарлах байранд 959 иргэнийг тусгаарлан ажиллаж байна. УОК-ын шуурхай штаб ХӨСҮТ-өөс өгсөн үүрэг даалгаврын дагуу халдвартай иргэдийг тусгаарлан ажиглах байранд шилжүүлж байгаа. Мөн өнгөрсөн хоёр, гурван удаагийн захиалгат нислэгээр ирсэн зургаан тусгаарлах байранд 348 иргэн тусгаарлан ажиглах байранд байна. Сая зарласан нислэгийн дагуу зургаан тусгаарлах байрны бэлтгэл хангасан. Тусгаарлан ажиглах байрны дэг журам, аюулгүй байдалд холбогдох албаныхан анхаарч ажиллаж байна. Камерын хяналтаар илэрсэн зөрчлийг арилган ажиллаж байна. Эрүүл мэндийн байгууллага, онцгой байдал, цагдаагийн байгууллага хамтран ажиллаж байна. Халдвар хамгааллын дэглэм тусгаарлах ажиглах байр дотроо гурван бүсэд хуваагддаг. Ногоон бүсэд хоол хүнс боловсруулдаг. Шар бүс буюу завсрын бүсэд хоол хүнс зөөх хэсэг байдаг.  Улаан бүсэд тусгаарлалтад буй иргэд болон онцгой байдлын алба хаагч, эмч, цагдаагийн байгааллагын ажилчид ажиллаж байна” гэлээ.