Их, дээд сургууль, коллежид суралцаж буй оюутнуудад 2020-2021 оны хичээлийн жилд сургалтын төлбөрийн дэмжлэг үзүүлэхээр болсон. Энэ талаар БШУ-ы сайд Л.Цэдэвсүрэн мэдээлэл өгсөн. Энэ үеэр сэтгүүлчид хариулт авлаа.

-Таван мянга гаруй оюутанд сургалтын төлбөрийн зээл олгож, гэрээ хийхээр болсон гэсэн. Эрэлттэй мэргэжлийн жагсаалтад багтсан мэргэжлээр суралцаж байгаа оюутнууд хамрагдах уу?

-2020-2021 оны хичээлийн жилд тэргүүлэх чиглэлээр 2.8 ба түүнээс дээш голч дүнтэй суралцаж байгаа 2782 оюутны зээлийн асуудлыг шийдсэн. Таван мянган гаруй оюутан тэргүүлэх чиглэлийн мэргэжлээр суралцаагүй хичээлийн шинэ жил эхлэхэд боловсролын зээлийн сангаас зээлээр суралцах хүсэлт гаргаж, гэрээ байгуулсан оюутан хамрагдаж байна.

-Дотуур байранд амьдарч байсан оюутнуудын сургалтын төлбөрийг буцаан олгох уу?

-Оюутнуудыг эм бэлдмэл, ариун цэврийн хэрэгслээр хангаж арванхоёрдугаар сарын 7,8-ны өдөр шинжилгээнд хамруулж орон нутаг руу буцаасан. Өнөөдрийг хүртэл дотуур байранд цөөн тооны оюутан байгаа. Гэрээсээ теле хичээлийг үзэж байгаа оюутнуудад  сургалтын төлбөрт уян хатан хандаж заримыг буцааж, үлдсэн төлбөрийг дараагийн улирлын хичээлийн төлбөрт суутгах талаар сургуулийн захиралуудтай ярилцаж байна.

-Хоёрдугаар сарын 1-нээс танхимын сургалт эхлүүлэх үү. Энэ талаар ямар судалгаа хийж байгаа вэ?

-Хоёрдугаар сарын 1-нээс  ЕБС-ийн нэгдүгээр улирлын амралт дуусч, орох хугацаа. Танхимын хичээл оруулах эсэх талаар 4-5 төрлийн судалгаа хийж байна. Эцэг эх, багш, оюутан сурагчид, боловсролын байгууллагын ажилчдаас судалгаа авч нэгтгэнэ. Хоёрдугаар сарын 12-ны өдөр цагаан сарын баяр болно. УОК-оос нийтээр тэмдэглэхийг зөвшөөрөөгүй. Энэ үед УОК-оос дахин зохицуулалт хийнэ. Дараа долоо хоногт нэгдсэн шийдвэрийг УОК-т хүргүүлнэ.