Газар хөдлөлтийн нөхцөл байдлын талаар мэргэжлийн байгууллагууд хамтран хэвлэлийн  хурал хийлээ. Өнөө өглөө 05:33 цагт Хөвсгөл аймагт 6.6-6.8 магнитуд газар хөдөлсөн. Хүчтэй газар хөдлөлтөөс хойш хамгийн сүүлд 08:30, 09:10 цагт дахин чичиргээ мэдрэгдсэн талаар Ханх сумын Засаг дарга мэдэгдсэн юм. Харин Одон орон геофизикийн хүрээлэнгийн захирал С.Дэмбэрэл  "Өнөө өглөө 05 цаг 32 минут 58 секундэд Ханх сумаас 27 км-ын зайд 6.5 магнитудын хүчтэй газар хөдөлсөн. Одоо ч давтан газар хөдлөлт болсоор байна. Хамгийн сүүлийн мэдээгээр 100 гаруй удаа давтан хөдөлсөн. 

Үндсэн хөдлөлт нь 6.5 магнитуд, давтан хөдлөлтийн магнитуд харьцангуй бага байна. Гэхдээ магнитуд нь тав хүрсэн хөдлөлт дөрвөн удаа, магнитуд нь дөрөв хүрсэн хөдлөлт 10 удаа бүртгэгдсэн. Газар хөдлөлтийн голомтод 7-8 баллын чичирхийлэл үүссэн. Улаанбаатар хот нь тухайн цэгээс 610 км-ын зайд оршдог. Хүрэл тогоотын одон оргил дахь станцад бүртгэгдсэнээр Улаанбаатарын хадан хөрсөнд 3-4 баллын чичирхийллээр мэдрэгдсэн. Барилга байгууламжийн онцлог, ямар суурь хөрсөнд барьснаас шалтгаалан иргэдэд өөрөөр мэдрэгдсэн байна. Иргэдээс мэдэгдсэнгүй гэх шүүмжлэл гарсан. Хүчтэй газар хөдлөлт болсны дараа албан тушаалтнуудын цахим шууданд мэдээлэл хүргэдэг. Миний цахим шууданд үндсэн газар хөдлөлт болсноос хойш 10 минутын дараа мэдэгдсэн. Ийм хүчтэй газар хөдлөлтийн дараа иргэдэд хэрхэн мэдээлэх тухайг бид цаашид боловсруулна" гэв.