-Төв аймаг 27 сумынхаа зорчих хөдөлгөөнийг хаажээ-

Улаанбаатар хотод коронавируст халдварын тохиолдол эрс нэмэгдэж гарал үүсэл, маршрут нь тогтоогдохгүй, алаг цоог хэлбэрээр халдвар тархаж байна. Эрүүл мэндийн яамнаас Улаанбаатар хотоос орон нутаг руу халдвар тархах эрсдэлтэй тул иргэдийг хулгайн замаар зорчихгүй байхыг анхааруулсан. Иймд Төв аймгийн Онцгой комиссоос 27 сумынхаа зорчих хөдөлгөөнийг энэ сарын 11 хүртэл хаасан юм.

Энэ талаар Төв аймгийн Жаргалант сумын ЗДТГ-ын дарга В.Болортуяагаас тодруулахад “Аймгийн Онцгой комиссын шийдвэрийн дагуу Улаанбаатар хот руу явах, сум хооронд зорчих хөдөлгөөнийг хязгаарласан. Манай аймаг Улаанбаатар хотыг тойрон хүрээлдэг учир тус шийдвэрийг гаргасан. Манай суманд хүнс бараа тээвэрлэдэг, түгээлтийн тусгай зөвшөөрөлтэй, PCR-ын шинжилгээний хариутай олон тээврийн жолооч ирж байгаа. Харин одоо гурав хоногийн хугацаанд хүнс барааны татан авалт болон бусад бараа материалын түгээлтийн зөвшөөрөл олгохгүй. Манай суманд “Мөнххада” компанийн ажилчдын  хавьтал хэмээн үзэж байгаа нэг хүн байгаа. Тухайн хүнээс хоёр удаа түргэвчилсэн оношлуураар шинжилгээ авсан. Шинжилгээний хариугаар халдваргүй гэж гарсан. Харин PCR-ын шинжилгээний хариу гараагүй байна. Одоогоор бүх арга хэмжээг авч тусгаарлаж байгаа. Гэхдээ тухайн компанийн ажилчдаас халдвар илрэхээс өмнө суманд ирсэн. Тухайн хүнд ямар нэгэн шинж тэмдэг илрээгүй байна. Зарим мэдээллийн сайт манай сумын талаар худал мэдээлэл гаргаж, иргэдийг айлгаж, сандаргасан тохиолдол гарч байна” гэлээ.