Эрүүл мэндийн яамны ээлжит мэдээллийн үеэр УОК-ын шуурхай штабаас мэдээлэл хийв. ОБЕГ-ын дарга, хурандаа Б.Ууганбаяр "Хэвлэлээр УОК-ын шуурхай штабынхныг шинэ жил тэмдэглэсэн талаар мэдээлэл гарч эхэллээ. Өнгөрсөн сарын 30-ны өдөр УОК-ын шуурхай штаб дотооддоо хурал зохион байгуулсан. Бид бүтэн жилийнхээ ажлыг дүгнэж, хурлын төгсгөлд онцгой байгууллагын албаны зарим шагналаар УОК-ын шуурхай штабт бүтэн жил ажиллаж байгаа зарим алба хаагчийг шагнасан. Шинэ жилийн арга хэмжээ зохион байгуулаагүй. "Урмыг нь хугалахаар ууцыг нь хугал" гэсэн үг байдаг гэдгийг онцолмоор байна. 

УОК-ын шуурхай штабт ХӨСҮТ-өөс чиглэл өгсний дагуу өчигдөр оройн 18:00 цагаас эхлэн шөнийн 02:00 цаг хүртэл  халдварын голомт гарсан "Ачтан" эмнэлэгтэй холбоотой хүмүүсийг тусгаарлах арга хэмжээг зохион байгууллаа. Нийт 97 хүнийг тусгаарлах байр руу шилжүүлсэн. Тусгаарлалтын эмчилгээ, үйлчилгээний асуудлыг эрүүл мэндийн байгууллага хариуцан ажиллаж байгаа.  Тусгаарлалттай холбогдолтой асуудлыг УОК хариуцаж байна. Тусгаарлан ажиглах байрны нөөцийг нэмэгдүүлэхээр болсон. Өнөөдөр нэмж хоёр байрыг тусгаарлах зориулалтаар бэлтгэлээ. Холбогдох сургалтыг зохион байгуулсан" гэв.