Арванхоёрдугаар сарын 27-ны “Ideree’s Home Party”, YouTube нэвтрүүлгийн оролцогчид УОК-ын нэр барьж, найзуудаараа тоглож байгаа бичлэг цацагдсан билээ. Энэ талаар УОК-ын шуурхай штабын дарга Б.Ууганбаяр "Өчигдөр олон нийтийн сүлжээнд марзан, хошин яриа ярьдаг зургаан хүн УОК-ын нэрийг барьж, найз нөхөдтэйгөө утсаар ярьж байгаа бичлэгийг үзлээ. УОК-ийн шуурхай штабаас эдгээр хүнийг хууль хяналтын байгууллагаар шалгуулна. Халдварт өвчин бол тоглоом биш, тоглоом тоотой нь дээр гэдэг юм. Халдварт өвчнөөр тоглосон эл этгээдүүдтэй хатуу тэмцэнэ" хэмээн ЭМЯ-ны 11:00 цагийн мэдээллээр мэдэгдсэн.

Тэгвэл үүний дараахан тус нэвтрүүлгийн хөтлөгч Б.Идэр-Од цахим хаягтаа тайлбар хийжээ. Тэрбээр “Коронавирусийн эсрэг тэмцэх ёстой үнэт цагийг нь алдагдуулсан, хошигнол хийж УОК-ын ажлыг шаардлагагүй өөр зүйлд чиглүүлсэн чирэгдэл учруулсандаа уучлал хүсье. Онцгой байдалд ажиллаж буй төрийн албан хаагчид, эмч, эрүүл мэндийн ажилтнуудаа хүндэтгэж байгаагаа илэрхийлж, маргаан үүсгэж буй контентын хэсгийг интернетээс татан авснаа мэдэгдэж байна. Ideree’s Home Party, YouTube нэвтрүүлгийн 2020 оны арванхоёрдугаар сарын 27-ны өдрийн дугаарын оролцогчид" хэмээх тайлбар бичжээ.