Монгол Улсын и-спортын “IHC”  баг "PUBG Mobile"-ын дэлхийн аварга шалгаруулах тэмцээн болох "PUBG Mobile Global Championship 2023” тэмцээний тэргүүн цомыг өндөрт өргөлөө. Дэлхийн шилдэг 16 баг өрсөлдсөн Grand Final шат гурван өдөр үргэлжилж “IHC” багын ялалтаар өндөрлөлөө.

Тус дэлхийн аваргын тэмцээнд Монголын “IHC” баг 142 оноогоор тэргүүн байрт, дэд байрт 138 оноогоор "Stalwart Esports" баг, "4Merical Vibes" баг 127 оноогоор дөрөвдүгээр байрт шалгарсан юм.

        Дэлхийн аваргын цомыг өргөсөн “IHC”  баг нь өмнө нь  “Zeus” нэрээр үйл ажиллагаагаа явуулдаг байжээ. Alex, Godless, Zyol, DEMO, Abely гэсэн таван гишүүнтэйгээр энэ удаагийн тэмцээнд оролцсон бөгөөд “IHC”  багийг анх С.Ундрах үүсгэн байгуулжээ.

Undaak

Сүхбаатарын Ундрах нь PUBG Mobile тоглогч байсан бөгөөд одоо “IHC ESPORTS” компанийн гүйцэтгэх захирал юм. Тэрбээр өмнө нь 2018 оноос эхлэн  “Zeus” багийн тоглогч байсан бөгөөд 2019 онд “IHC”  багт харьяалагдах болжээ.

Zyol

Энэ удаагийн дэлхийн аварга шалгаруулах тэмцээний MVP буюу үнэ цэнтэй тамирчнаар шалгарсан Zyol буюу Баярцэнгэлийн Золбоот нь 2005 оны нэгдүгээр сарын 27-нд төржээ. Тэрбээр “IHC”   багт 2021 оны арванхоёрдугаар сарын 7-нд нэгджээ.

Abely

Нямлхагвагийн Дулаанжаргал нь 1999 оны аравдугаар сарын 25-нд төржээ. Тэрбээр “Zeus” багт 2020 оны хоёрдугаар сард нэгдэж байжээ.

DEMO

Батхуягийн Батбагана 2021 оны гуравдугаар сард анх “SEAL” багт нэгдэж байжээ. Тус багаас 2022 оны тавдугаар сард гарч “IHC”  багт нэгдсэн юм. Тэрбээр 2001 оны хоёрдугаар сарын 7-нд төржээ.

Godless

Баатархүүгийн Билгүүн нь 2021 оны нэгдүгээр сард “Zeus” багийн тоглогч болж байжээ. Ингээд мөн оны арванхоёрдугаар сараас “IHC”  багийн тоглогч болсон байна. Тэрбээр 2004 оны есдүгээр сарын 27-нд төржээ.

Alex

Хатанбаатарын Хүсэлбаатар нь өмнө нь “Zeus” багийн гишүүн байсан бөгөөд 2005 оны гуравдугаар сарын 1-нд төржээ.

2023 PMGC Grand Finals | 3 дэх өдөр | PUBG MOBILE дэлхийн аварга шалгаруулах тэмцээн