Бүгд найрамдах Солонгос Улсад ажиллаж байсан монгол иргэн тус улсын иргэдэд зодуулж, нас барсан гэх мэдээлэл өнгөрсөн оны зургадугаар сард гарсан. Тодруулбал, БНСУ-ын Умард Чүнчон мужийн Ымсон хотод тус хэрэг гарсан гэх. Улмаар талийгаачийг нас барснаас нь олон хоногийн дараа гэрээс нь олсон байдаг. Гэвч тус хэргийг БНСУ-ын цагдаагийн газраас хэрэгсэхгүй болгож хаасанд гэрийнхэн нь гомдолтой байгаа. Талийгаачийн ар гэрийнхэнд ямар тусламж үзүүлж байгаа талаар Монгол Улсаас БНСУ-д суугаа Элчин сайдын яамны Консулын хэлтсийн дарга Б.Тэнүүнээс тодрууллаа.

-БНСУ-д ажилладаг монгол иргэн цалингаа авч чадахгүй байсаар 2021 оны зургадугаар сард гэртээ нас барсан гэх мэдээлэл бий. Талийгаачийн ар гэрийнхэнд ямар тусламж, дэмжлэг үзүүлж байна вэ?

     -2021 оны зургадугаар сард БНСУ-д монгол иргэн амиа алдсан харамсалтай хэрэг гарсан. Бид тус хэрэгт анхнаасаа онцгой анхаарч, талийгаачийн эгчийг ирэх бүрд уулзаж, цагдаа, прокурор, хүний эрхийн холбоо болон өмгөөллийн үйлчилгээ авахад нь хамт явж, тусалдаг. Талийгаачийн хэргийг дахин шалгаж өгөхийг ар гэрийнхэн нь шаарддаг. Бид иргэний хүсэлтийг тухай бүрд нь албан бичгээр хуулийн байгууллагад шилжүүлж өгсөн. Гэвч ар гэрийнхэн нь манай байранд ирж, зохисгүй үйлдэл гаргах, хашхирах, үйлчлүүлж буй иргэдийн тайван байдлыг алдагдуулдаг. Тиймээс ойр орчинд үйлчлүүлж буй иргэд цагдаа дууддаг. Бид консулын хуулийн дагуу үйлчилгээ явуулдаг. Бидэнд хийж чадах, чадахгүй ажил гэж бий. Талийгаачийг гаднын нөлөөгүй нас барсан гэх үндэслэлээр хаасан байна лээ.

-БНСУ-д ажиллаж, амьдарч буй монгол иргэд нэмэгдэхийн хэрээр тэдэнтэй холбогдох гэмт хэрэг, эрсдэл нэмэгддэг. БНСУ-д жилд хэчнээн иргэн амиа алдаж байна вэ?

       -БНСУ-д жил ойролцоогоор 40 орчим иргэн амиа алддаг гэх мэдээлэл бий. Үүний шалтгаан нь авто осол, амиа хорлох, гэнэтийн шалтгааны улмаас ихэвчлэн амиа алдсан байдаг. Монголчуудын хэрэгт холбогддог шалтгаан нь архитай холбоотой.

-БНСУ-д албан бусаар ажилладаг хэчнээн хүн байна вэ?

     -БНСУ-ын Хууль зүйн яамнаас гаргасан мэдээллээр 55 мянган монгол иргэн тус улсад амьдарч байна. Үүнээс бүртгэлгүй, визний хугацаа нь хэтэрсэн 17 мянган иргэн байна. Солонгос Улсад ирж байгаа монгол иргэд нэмэгдэж байгаа. Зарим өдөр гурван онгоц буж байна. Иргэд Солонгос Улсад ирэхдээ аялалын зорилгоо зөв, тодорхой бичиж, хилийн байцаагчийн асуултад зөв хариулахад хилийн зөрчил гарахгүй.

-Консулын газарт өдөрч хэчнээн иргэн үйлчлүүлдэг вэ?

     -Бид зөвхөн монгол иргэдэд үйлчилдэг учир Монголын амрах, ажиллах цагийн хуваарийн дагуу ажилладаг. Манайд өдөрт 70-130 иргэн үйлчлүүлдэг. Гэрлэлтээ батлуулах, цуцлуулах, виз мэдүүлэх, өмгөөлөгч авах зэрэг бүх үйлчилгээний дэмжлэг үйлчилгээг авдаг.