Нийслэлийн прокурорын газраас хянасан зарим хэргийн шийдвэр, явцын талаар мэдээлэл өглөө.

        Энэ үеэр тус газрын Хэрэг бүртгэх, мөрдөн байцаах ажиллагаанд хяналт тавих хоёрдугаар хэлтсийн дарга Г.Гэрэлтуяа “2023 оны нэгдүгээр улирлын байдлаар нийт 482 гомдол мэдээлэлд нийслэлийн прокурорын байгууллага хяналт тавьж ажилласан. Ингэхдээ хэрэг бүртгэл дээр 954, мөрдөн байцаалтын 356 хэрэгт хяналт тавьж ажилласан байна. Эдгээрээс 116 хэрэгт яллах дүгнэлт үйлдэж, шүүхээр шийдүүлэх шийдвэрийг прокуророос гаргасан.

      Олны анхаарал татсан зарим хэргийн мэдээллийг хүргэж байна. Тухайлбал, Эрүүл мэндийн яамны Төрийн захиргаа, удирдлагын газрын ахлах мэргэжилтэн Б, Ч нарт холбогдох хэрэг болон Автотээврийн үндэсний төвийн хэлтсийн даргаар ажиллаж байсан М, Т, Х нарын хэргийг шүүхэд шилжүүлсэн. Мөн Мал эмнэлгийн даргаар ажиллаж байсан Х, Д нарт холбогдох хэрэг, Өмнөговь аймгийн Ханбогд сумын Гаалийн улсын байцаагч нарт холбогдох хэрэг, Дулааны дөрөвдүгээр цахилгаан станцын зоогийн газрын даргаар ажиллаж байсан Б-д холбогдох хэргийг тус бүр шүүхэд шилжүүлсэн. Мөн Эрдэнэт үйлдвэрийн мэргэжилтнээр ажиллаж байсан М болон БНХАУ-ын  Хөх хотод суугаа Ерөнхий консулаар ажиллаж байсан  М-д , Автотээврийн үндэсний газрын Цогтцэций сумын даргаар ажиллаж байсан Д-д, Эрдэнэт үйлдвэрийн Төрийн өмчит үйлдвэрийн газраар ажиллаж байсан Д-д, Зам тээврийн хөгжлийн яамны Замын ашиглах хэсгийн хэлтсийн дарга О-д,  Хил хамгаалах ангийн хилийн цэргийн 0131-р ангийн Гашуун сухайт боомтын шалган нэвтрүүлэх баримт бичгийн шалгагч Д нарт холбогдох хэргийг мөн тус бүр яллах дүгнэлт үйлдэн шүүхэд шилжүүлсэн” гэв.

-Нүүрс олборлох, худалдаалах, тээвэрлэх хэрэгт одоогоор 48 мөрдөгч мөрдөн шалгах ажиллагаа явуулж байна-

            Үргэлжлүүлэн тэрбээр нүүрс олборлох, худалдаалах, тээвэрлэхтэй холбогдуулан мөрдөх ажиллагаа явуулж байгаа талаар мэдээлэл өглөө.

Тэрбээр “Нүүрс олборлох, худалдаалах, тээвэрлэх хэрэгт одоогоор 48 мөрдөгч мөрдөн шалгах ажиллагаа явуулж, нийт 12 прокурор эдгээр хэргүүдэд хяналт тавин ажиллаж байна. Одоо ажиллагаанд шалгагдаж байгаа 47 хэрэг байна. Хэрэг бүртгэлтэй 24 хэрэг, мөрдөн байцаалтад 23 хэрэгт мөрдөн шалгах ажиллагаа явуулж байна. Хамтарсан ажлын хэсэг мөрдөн шалгах ажиллагаа явуулсан нийт хэргээс нийт 57 хүнд холбогдох долоон хэрэгт нийслэлийн прокурорын газраас яллах дүгнэлт үйлдэж шүүхэд шилжүүлсэн.  Ингээд нийт мөрдөн шалгах ажиллагаа явуулсан хэрэгт 127 хүнийг эрүүгийн хэрэг үүсгэн яллагдагчаар татсан. Тэдгээрээс 68 нь нийтийн албан тушаалтан байгаа. Эдгээрийн 13-н улсад нөлөөлсөн хэрэгт Эрүүгийн хэрэг үүсгэн яллагдагчаар татан шалгагдаж байна. Эдгээрээс 127 хүндээ тасан сэргийлэх арга хэмжээ авсан. Мөн 24 хүнд цагдан хорих таслан сэргийлэх арга хэмжээ авсан. Одоо нийт таван хүн цагдан хориулсан, шалгагдаж байна” гэлээ.